ବାୟୁଯାନ

ଇଚ୍ଛା ହୁଏ ଉଡ଼ିବାକୁ

ନାହିଁ ମୋର ଡେଣା,

କାଗଜରେ ତିଆରିଛି ଏକ ବାୟୁଯାନ

ଶତଇଚ୍ଛା ତୁମକୁ ସାଥିରେ ନେଇ ଉଡିଯିବି

ଖୋଜି ଖୋଜି ପହଞ୍ଚିବା ଏକ ଅଜଣା ମୂଲକେ ।

ଆମର ଏ ଦୂଷିତ ଭୂଲୋକ

ଯେଉଁଠି କେବଳ ସଠତା, ପ୍ରବଞ୍ଚନା

ଘୃଣା ଆଉ ସ୍ଵାର୍ଥପରତାର ରାଜୁତି,

ଏଠି ମମତା ମୂଲ୍ୟହୀନ

ଭାଇଚାରା ବିପନ୍ନ

ବିଶ୍ୱାସ ମରିଛି

କର୍ତ୍ତବ୍ୟରେ ପଡିଅଛି ତାଲା

ସତ୍ୟ ଲାଞ୍ଛିତ

ଧର୍ମ ଅବକ୍ଷୟ

ଶାନ୍ତି ନିରୂଦିଷ୍ଟ

ଆଉ ପ୍ରେମ ଧର୍ଷିତା ।

ଚାଲ ଏଠୁ ଛାଡି ଚାଲିଯିବା

ଯେଉଁଠି ଥିବ ପୁଳା ପୁଳା ଆନନ୍ଦ

ସ୍ଵର୍ଗସମ ଅତୀନ୍ଦ୍ରିୟ ସୁଖ,

ଆଉ ନ ଥିବ

ଆମକୁ ସହିପାରୁନଥିବା

ଅସହିଷ୍ଣୁ ମଣିଷମାନେ ।

ଆସ, ମୋତେ ସାଥ୍ ଦିଅ

ଉଡ଼ିଯିବା ସେହି ଦୂରନ୍ତ ରାଇଜେ

କମନୀୟ ମେଘମାଳା ସାଥେ

ନାଚି ନାଚି ଗାଇ ଗାଇ

ଗଢିବା ଏକ ମୁକ୍ତ ଜୀବନ

ଯେଉଁଠି ତୁମେ ଥିବ

   ଆଉ "ମୁଁ" ।