ବାତ୍ୟା ଆସିଗଲେ ଖୁସି ମୁଁ ଅଧିକ

ଫନି ହୁଡୁ ହୁଡୁ ତିତିଲି ମଧ୍ୟରେ 

ଲାଗିଥିଲା ଦିନେ ଲଢେଇ 

କିଏ ବଳଶାଳୀ ପ୍ରକୋପ ଅଧିକ 

ଛାନିଆ କରିଛି କନ୍ଦେଇ

ତିତିଲି କହିଲା ମୁଁ ବଡ ଅଟେ 

ଫନି ମୁହଁ ଦେଲା ଶୁଖାଇ 

ହୁଡୁ ଡୁହୁ ଗାଏ ନିଜର ବଡ଼ିମା 

ଯାହା ଥିଲା ସିଏ ଦେଖାଇ 

ତିନିହେଁ ନିଜର ବଡ଼ିମା ଦେଖାଇ 

ଲାଗିଗଲେ ଯେବେ ଲଢେଇ

ଶୁଣୁଥିଲେ ତାକୁ ଅଫିସର ବାବୁ 

କାନ ଟିକେ ଟିକେ ପତେଇ 

କହିଲେ ସଭିଏଁ ବଡ ଅଟତୁମେ 

କେହି ନୁହେଁ ଛୋଟ କା' ଠାରେ 

ଆସିବାରୁ ତୁମେ ଦେଖ ମୋ ଅବସ୍ଥା 

ଧନୀ ମୁଁ ସଭିଙ୍କ ଭିତରେ 

ତୁମେ ଆସିବାରୁ ମୋ ଘରକୁ ପରା 

ଲକ୍ଷ୍ମୀ ଆସିଛନ୍ତି ଦୌଡ଼ି 

ଖାଦ୍ୟ ଆଉ ଟଙ୍କା ରିଲିଫ ଭିତରେ 

ଘରେ ମୋର ଖୁସି ଲହରୀ 

ତୁମେ ଆସିବାରୁ ଟଙ୍କାର ଅଭାବ 

ନାହିଁ ମୋର ଘରେ କା' ପାଶେ 

ବାତ୍ୟା ଆସିଗଲେ ଖୁସି ମୁଁ ଅଧିକ 

ଘରକୁ ଯାଏ ମୁଁ ହରଷେ

ତୁମେ ତ ତିନିହେଁ ମିଶିଯାଇ କେବେ 

କରିବ ତାଣ୍ଡବ ଏଥର 

ଚାହିଁ ମୁଁ ବସିଛି ଅଫିସ ଦୁଆରେ 

ନେବା ପାଇଁ ଧନ ପ୍ରଚୁର

ଚାଲି ଯାଅ ଏବେ ଲାଗନାହିଁ କଳି 

ଅଫିସିର ପିଣ୍ଡା ଦୁଆରେ

ଜାଣିବେ ଜନତା ମୁଁ ଯେ ବଡ ଚୋର 

ବାନ୍ଧି ଦେବେ ମୋତେ ଗଛରେ