★ ବାପାଟିଏ ★
★ ବାପାଟିଏ ★
ଜରୁରୀ ପଡେନି ଆଉ ମୋତେ ,
ବାପାଙ୍କ ପାଲଟା କାମିଜ୍ !
ହ୍ୟାଙ୍ଗରରେ ଟାଙ୍ଗି , ମୁହଁ ଧୋଉଧୋଉ ,
ସବୁଯାକ ଖୁଚୁରା ଚୋରୀ କରିନେବା ,
ଜରୁରୀ ପଡେନି ଆଉ !!!
ଜରୁରୀ ପଡେନି ଆଉ ମୋତେ ,
ବାପାଙ୍କ ସାରାରାତି ଅନିଦ୍ରା !
ଜ୍ୱରରେ କମ୍ପୁଥିଲା ବେଳେ ମୁଁ,
ଥରଥର ଆସି ତାତି ମାପୁଥିବା ,
ଜରୁରୀ ପଡେନି ଆଉ !!!
ଜରୁରୀ ପଡେନି ଆଉ ମୋତେ ,
ବାପାଙ୍କ ମଜବୁତ୍ ଦୁଇହାତ !
ମୋ' ଟଳମଳ ସାଇକେଲ୍ କ୍ୟାରିଅର ପଛେ ,
'ଚଲାଚଲା କିଛିହେବନି ' କହି ଛାଡିଦବା ,
ଜରୁରୀ ପଡେନି ଆଉ !!!
ଏବେ ତ ମୁଁ ବଡ ହୋଇଗଲି ।
ଶହେକିମି ବେଗରେ ଗାଡି ଦୌଡାଇବାହେଉ କି,
ନିଜେ ନିଜ ଦେହପାଇଁ ତାତି ମାପିନେବାହେଉ ।
ଜରୁରୀ ପଡନ୍ତିନି ଏବେ ବାପା ଆଉ ।
ଏବେ ମୁଁ ବଡ ହୋଇଗଲି ,
ଏବେ ମୁଁ ବାପା ହୋଇଗଲି ।
ଫରକ୍ ଟା ଖାଲି , ବୁଝିଗଲି ଯାହା ,
ବାପାଟିଏ ଘରକୁ ଫେରିଲାବେଳେ ,
ବାଟରୁ ଟଙ୍କା ଭାଙ୍ଗି ,
ଖୁଚୁରା ମେଞ୍ଚାଏ କରିଆଣିବାରେ କି'ଥାଏ ରହସ୍ୟ !!!
ସତତ ଏୟାବି ଯେ ,
ମୁଁ ବାପା ହେଇଯିବା ସ୍ୱତ୍ତେ ,
ମୋପରି ସବୁ ସନ୍ତାନକୁ ,
କାଳେକାଳେ ଜରୁରୀ ପଡୁଥାଏ ,
ବାପାଟିଏ , ବାପାଟିଏ , ଖାଲି ବାପାଟିଏ !!!!
@ ଅମୀୟ ବେଜ୍ , ଘଟଗାଁ , କେନ୍ଦୁଝର
ବିଶ୍ୱ ପିତୃ ଦିବସ ପାଇଁ