ବାଣୀ ଆବାହନ

 (ରାଗ -ଚୋଖି )

କର କରୁଣା ଜନନୀ ଶ୍ୱେତ ବାରିଜ ବାସିନୀ

ସରୋଜିନୀ ବାଣୀ ବୀଣାପାଣି ଭାରତୀ l

ସୁରାସୁର ନରାରାଧ୍ୟା ଜ୍ଞାନୀ ଜନ ଜ୍ଞାନ ପ୍ରଦା

ଜଗତ ଜନ ଜନନୀ ମା ସରସ୍ୱତୀ l

ନୃତ୍ୟ ଗୀତ କଳା ରୂପିଣୀ 

ଚାରୁ ସଂସ୍କୃତି ସମ୍ପର୍ଣ୍ଣା ରାଗ ରାଗିଣୀ l01l

କମଳେ ପଦ କମଳ ଜ୍ୟୋତି ଅମଳ ଧବଳ

ତରୁଣ ତରଣୀ କର ସମ ଶୋଭନ l

ଦ୍ଵିଜରାଜ ଲାଜଭରେ ଶରଣ ପଦ କଞ୍ଜରେ

ପାଣିରେ ବୀଣା ଆହ୍ଲାଦ ସୁର ଗୁଞ୍ଜନ l

ଚୂଡ଼ା ଶିରେ ଗଣ୍ଡେ କୁନ୍ତଳ 

ତଡ଼ିତ ଜଡ଼ିତ ରଶ୍ମି ମୁଖମଣ୍ଡଳ l02l

କର୍ଣ୍ଣେ କନକ କୁଣ୍ଡଳ ରଞ୍ଜିତ ମଣି ମଣ୍ଡଳ

ଗଳେ ମୁକ୍ତାମାଳ ସୌଦାମିନୀ ଗଞ୍ଜନ l

ଶୁକ୍ଳ ବସ୍ତ୍ର ପରିହିତା କୁନ୍ଦେନ୍ଦୁ ବର୍ଣ୍ଣ ଶୋଭିତା

ନଖ ପଂକ୍ତି ଜିଣି ପ୍ରଭାକର କିରଣ l

କଜ୍ଜଳେ ଉଜ୍ଜଳ ନୟନ 

ମୃଣାଳ ଗଞ୍ଜିତା କରେ ଗ୍ରନ୍ଥ ଶୋଭନ l03 l

ପ୍ରଣମାମି ପଦାମ୍ବୁଜେ ଆମ୍ବୁଜ ବାସିନୀ ପଦେ

ଦିଅ ବରାଭୟ ବରାଭୟ ଦାୟିନୀ l

ଅଧମ ଅକ୍ଷମ ସୁତ ଅଜ୍ଞାନତା ନାଶ ମାତ

ହରି ମନୋହାରୀ ବିଶ୍ୱ ଜ୍ଞାନ ରୂପିଣୀ l

ଅନଭିଜ୍ଞ ଶ୍ରୀକାନ୍ତ ଭାଷ 

ଦୟାମୟୀ ଦୟାରେ ପୁରୁ ଅଭିଳାଷ l04l