ବାଇଚଢେଇ

ବାଇ ଚଢ଼େଇରେ ବାଇ ଚଢ଼େଇ

ତୋ ମା ଯାଇଛି ଗାଈ ଚରେଇ

ଗାଈରୁ ଆଣିବ ପାଚିଲା ବେଲ

କୋଳରେ ବସାଇ କରିବ ଗେଲ |

   ବାଇ ଚଢ଼େଇରେ ବାଇ ଚଢ଼େଇ

   ବାଆ କଲେ ବସା ଦୋହଲୁ ଥାଇ

   ଖରା ବରଷାକୁ ନାହିଁ ତୋ ଡର

   ତୁହି ପକ୍ଷୀ ଜାତି ଇଞ୍ଜିନିୟର |

ଟିକି ଡେଣାଟିରେ କେତେ ଯେ ବଳ

ଥଣ୍ଟଟି ତୋହର କରତ କଳ

ଆଖୁ ପତରକୁ ଯତନେ ଚିରି

ଥଣ୍ଟରେ କାମୁଡ଼ି ଆସୁ ବାହାରି |

    ଉଚୁଆ ନଡ଼ିଆ ତାଳ ଗଛରେ

    ବସା ବାନ୍ଧିଥାଉ ବଡ଼ ସଞ୍ଚରେ

    ବରଷାରେ ପାଣି ପଶଇ ନାହିଁ

   କୋଠରୀ କୋଠରୀ ହୋଇଛି ତହିଁ |

ପିଲା ଛୁଆ ତୋର ଖେଳିବା ପାଇଁ

ଦୋଳି ଲଗାଇଛୁ ବାଇ ଚଢ଼େଇ

ମନ ହୁଏ ତୋର ସାଥିରେ ଯାଇ 

ହସି ଖେଳି ମଜା ନିଅନ୍ତି ମୁହିଁ |

   ବିଜ୍ଞାନୀ ମଣିଷ ସବୁ ସାରିଲା

   ବଣ ବୁଦା ଗଛ ପଦା କରିଲା

   ଆଶ୍ରୟ ନପାଇ ଗଲୁ ପଳାଇ

   ଦୁଃଖ କରେ ଆଜି ତୋହରି ପାଇଁ |