ଅପାଶୋରା ପିଲାଦିନ

ଜୀବନର ସବୁ ସ୍ମୃତିଠୁ ମଧୁର

ବିହ୍ଵଳିତ ସେହି କ୍ଷଣ,

କାହିଁକି କେଜାଣି ବୟସ ମୋ

ଫେରେ, ସ୍ମୃତି କଲେ ରୋମନ୍ଥନ। [୧]

ମନେ ପଡିଯାଏ ପିଲାଦିନ କଥା

ପୁଚି ବୋହୁଚୋରି ଖେଳ,

ତୋକ ଖରାବେଳେ ଅଧାନିଦୁ ଉଠି

କୋଳି ତୋଳିବାର ବେଳ। [୨]

ହାମ୍ବଡା ଖଟାକୁ ଯେଉଟ ଚଟଣି

ତା ସାଥେ ନାଲିଆ ଟଭା,

ପଖାଳକୁ ମାଛ ପତ୍ରପୋଡା ଆମ୍ବ

ଚଟଣି ଭିଁ କୋଳି ଭଜା । [୩]

ବାଡିର ଭଇଁଚ ବେତ ଖିରି କୋଳି

ଆଜିତ ସପନ ସମ,

ଆହାକି ସୁମିଷ୍ଟ ଦହି ଦହି ଲଟି

ପେଷ୍ଟ୍ରୀ ଠାରୁ ମୂଲାୟମ। [୪]

ସାନ ବଡ ସାଙ୍ଗ ସାଥି ମେଳେ

ସନ୍ତସନ୍ତି ଧାନ ବିଲେ ଯାଇ,

ପୁଚୁରୁ ପାଚୁରୁ କାଦୁଅ ଚିମୁଟି

ଗଡିଶା କେରାଣ୍ଡି ନେଇ । [୫]

ମଝି ଗୋହିରିର ଇଟାଭାଟି କଡେ

ଭାତ ମାଛ ଝୋଳ ଭୋଜି,

ଭୋଜିର ଅନ୍ତରେ ରଥିଆ ତେଣ୍ଡାରେ

ପାଣି ବୋହିବାର ବାଜି । [୬]

ଚାନ୍ଦିନୀ ପିଣ୍ଡାରେ ବାଘବାଜି ଆଉ

କାଚ କଉଡିର ଖେଳ।

ଶୀତଳ ଷଷ୍ଠୀରେ ବାଦିପାଲା ଦେଖି

ରାତି ପୋହିବାର ବେଳ । [୭]

ମୁଣ୍ଡ ପୋତା କେଳା ଘଣ୍ଟପାଟ ନାଟ

ବାଉଁଶ ରାଣୀର ଖେଳ,

ଶନିଆ ଭୋଇର ଧୁଡୁକି କୀର୍ତ୍ତନ

ଦୀନା ସାଇକେଲ ଖେଳ। [୮]

ଦୋଳ ମେଳଣରେ ଠେଲା ପେଲା

ହୋଇ ବାଇସ୍ କୋପ୍ ଦେଖା,

ନୂଆ ନୂଆ କେତେ ଖେଳନା ପାଇଁକି

ଅଳି କରିବାର ଗାଥା। [୯]

ନଣ୍ଡା ଶଗଡର ଦଣ୍ଡାରେ ଓହଳି

କେତେ ଉଠୁପଡ ସଜା,

ଗୁଆ ଖୋଳପାରେ ଘୁଷୁରି ଘୁଷୁରି

ସ୍ଲେଜ୍ ଗାଡିର ମଜା। [୧୦]

ନଡିଆ ବରଡା ପତରେ ତିଆରି

ଘଣ୍ଟା ସାଇକେଲ ମୁଦି,

ବଉଳ ଫୁଲକୁ ପଛୁ ପଛ ଗୁନ୍ଥି

ହାର କାନଫୁଲ ପିନ୍ଧି । [୧୧]

ତାଳ ପତରରେ କେତେ ଯେ ଆସନ

ଭୋଗେଇ ବିଂଚଣା ବୁଣି,

ଭୋଦୁଅ ପାହାନ୍ତି ଫୁଲ ତୋଳା ମଜା

ପୂଜିବା ଖୁଦୁରୁକୁଣି। [୧୨]

କୁଆଁର ପୂନେଇଁ ରାତି ସାରା ଖେଳ

କେତେ ମଜା ଗପ ସପ,

ବାଳୁଙ୍ଗା ପିଲାଙ୍କ ଛୁପି ଛୁପି ନାଟ

ଡାଳଭୂତ ପାଳଭୂତ । [୧୩]

ରଜ ପରବରେ ରଜ ଦୋଳି ଖେଳ

ସହ ରଜ ଦୋଳି ଗୀତ,

ବଡ ସୁଆଦ ଅମାଲୁ ବିରି ଲଡୁ

ତାଳ ପୋଡପିଠା ମିତ। [୧୪]

ବରଷା ସୁଅରେ ଛୋଟ ବଡ କେତେ

କାଗଜ ଡଙ୍ଗାର ଭେଳା,

ନାଲି ଟୁକୁଟୁକୁ ସାଧବ ବୋହୁକୁ

ଆଉଁସି ଦେବାର ବେଳା। [୧୫]

ବଉଳ ଆଖିରେ କାନ୍ଧିଆ ଚୋପାକୁ

ଖଂଜେ ଚିପୁଡିବା ମଜା,

ତେନ୍ତୁଳି ମଂଜି କୁ ଘୋରି ଘୋରି

ଦେହେ ଚେଙ୍ଗିବା ଦୁଷ୍ଟାମି ସଜା । [୧୬]

ଖେଳ ଛୁଟି ବେଳେ ଇସ୍କୁଲ ହତାରେ

ବର ଓହଳରେ ଖେଳ,

ପରୀକ୍ଷା ଶେଷରେ ଉଇ ହୁଙ୍କା ଖୋଜି

ସ୍ୟାହି ଢାଳିବାର ଭୋଳ। [୧୭]

ମୟୁର ଚନ୍ଦ୍ରିକା ଆହୁରି ବଢିବ

ବହିର ଭିତରେ ରଖି,

ଆହା କି ସରଳ ମାନସିକତାରେ

କେତେ ହେଉଥିଲୁ ଖୁସି। [୧୮]

ମନମୋ କହୁଛି ଟାଇମି ମେସିନି

ହୁଅନ୍ତାକି ଉଦ୍ଭାବନ,

ସବୁଠୁ ନିରୀହ ସବୁଠୁ ସରଳ

ଫେରନ୍ତାକି ସେହି ଦିନ। [୧୯]

ମନରେ ନଥିଲା କପଟ କାଳିମା

ନିଜ ପର ହୀନ ମନ,

ମଧୁଠୁ ମଧୁର ଦୁର୍ମୂଲ୍ୟ ସେ କ୍ଷଣ

ଅପାଶୋରା ପିଲାଦିନ। [୨୦]