ଅନୁତାପ

ଏ ଜୀବନପଥ ଅତି କଣ୍ଟକିତ

ଚାଲିବା ବହୁତ କଷ୍ଟ

ଯିଏସେ ଚାଲିଛି ସେଇ ହିଁ ଜାଣିଛି

ଜୀବନ ଚିତ୍ରକୁ ସ୍ପଷ୍ଟ ॥

ଦୁଃଖ ଆସିଥାଏ ସୁଖ ଆସିଥାଏ 

ଏହି ଜୀବନ ପଥରେ

ଦୁଃଖ ସୁଖ ସମ ଭାବେ ଯେ ଦେଖଇ

ପାଏନି କଷ୍ଟ ଅନ୍ତରେ ॥

ସବୁ କର୍ମ କେବେ ଠିକ୍ ହୁଏନାହିଁ

ହୋଇପାରେ କିଛି ତ୍ରୁଟି

ସେଥିପାଇଁ ଯଦି ମନେ ଅନୁତାପ

ମିଳେ ଉପଶମ କିଛି ॥

ଅଜାଚିତ ଦାନ ପଛେ ଖଳ ମନ

ରହିଥାଏ ସଦା ଛପି

ନବୁଝି ସେ ଦାନ କରେ ଯେ ଗ୍ରହଣ

ଭୋଗୁଥାଏ ଦୁଃଖ ବସି ॥

ନିଜ ଭୁଲ ପାଇଁ ସ୍ୱତଃ ଅନୁତାପ

ଆସଇ ଯଦି ମନରେ

ସେହି ଭୁଲ ପୁନଃ କରେନି ମଣିଷ

ଅବଶିଷ୍ଟ ଜୀବନରେ ॥

ଅନୁତାପ ଅଶ୍ରୁ ଧୋଇଦିଏ ମନୁ

ଥାଏ ଯେତେକ କଳୁଷ

ଜୀବନର ପଥେ ଆଗେ ଚାଲିବାକୁ

ଜଗାଏ ହୃଦେ ବିଶ୍ୱାସ ॥