ଅନୁତାପ

ଜୀବନ ରେ ଘଟେ ଏମିତି ଘଟଣା 

ଘଟଣା ନୁହେଁ ସେ, ଜୀବନ ଆଇନା,

ଫେରି ଚାହିଁ ଦେଲେ ମିଳଇ ଯନ୍ତ୍ରଣା 

ନିଦ ହୁଏ ନାହିଁ ରାତିସାରା ସିନା ।

ଜ୍ଞାତରେ ହେଉ କି ଅଜ୍ଞାତରେ ହେଉ

ଭୁଲ ଯଦି ହୋଇଯାଏ,

ସେହି ଭୁଲ ଯଦି ସୁଧାରି ନପାରେ

ଅନୁତାପ ସୃଷ୍ଟି ହୁଏ ।

ସମୟ ସରିଲେ ଅନୁତାପ କଲେ 

ଲାଭ କିଛି ହୁଏ ନାହିଁ,

ସମୟଟି ଆମ ମୂଲ୍ୟବାନ ଅଟେ

ହେବନି ତାକୁ ଏଡାଇ ।

ବିରତି ନିଏ ନାହିଁ ସମୟର ଗତି

ଛାଡିଯାଏ କିଛି ସ୍ମୃତି,

ଥରେ ଚାଲିଗଲେ ଆସେ ନାହିଁ କେବେ

ସ୍ୱର୍ଣ୍ଣ ଅବସର ତାତି ।

କାହା ଭୁଲ ପାଇଁ ସମ୍ପର୍କ ଭାଙ୍ଗିଲେ

ମନଟା ଆଘାତ ପାଏ,

ସେହି ସମ୍ପର୍କଟା ଯୋଡ଼ି ନ ପାରିଲେ

ଅନୁତାପ ରୂପ ନିଏ ।

ଅନୁତାପ ନୁହେଁ ଶେଷ ପନ୍ଥା ଆମ

ଆଶା ବି ଆଲୋକ ଦେବ,

ପ୍ରାୟଶ୍ଚିତ କରି ଆଗକୁ ବଢ଼ିଲେ

ଅନୁତାପ ଶେଷ ହେବ ।