ଅନ୍ତର୍ଜାତୀୟ ମହିଳା ଦିବସ ଓ ଭାରତ -ସଂଜୟ କୁମାର ତ୍ରିପାଠୀ

ଏଇ ଯେମିତି ଗୁରୁବାରୀ

ଘର କାମ ସାରି ଫେରୁଛି

ଗୋଧୂଳି ଲଗ୍ନରେ

ସେ କ’ଣ ପହଞ୍ଚି ପାରିବ ତା ପଣ୍ଡି କୁଟୀରରେ ?

ନିର୍ଭୟା, କୁନ୍ଦୁଲି ପୀଡିତାଙ୍କ ଦଶା ଭୋଗିବନି ତ ?

ନାରୀକୁ ପଣ୍ୟବସ୍ତୁ ରୂପେ ବିବେଚନା କରିବାର

ମନୋବୃତ୍ତ ବହୁଳ

ଏ ପୁରୁଷ ପ୍ରଧାନ ଭାରତୀୟ ସମାଜରେ

ମହାତ୍ମା ଗାନ୍ଧୀଙ୍କ ସ୍ୱପ୍ନର ରାମରାଜ୍ୟ

କ’ଣ ସାକାର ହୋଇ ପାରିବ ?

ଶ୍ରେଣୀ ବୈଷମ୍ୟ ଭରା ସମାଜ, ପ୍ରଦୂଷିତ ପ୍ରଶାସନ

ଓ ପଙ୍ଗୁ ବ୍ୟବସ୍ଥାରେ ଏକ କ୍ରୀଡନିକ ହୋଇ

ରହି ଯିବନି ତ ନାରୀ ?

ସୁନୀତା ୱିଲିୟମ୍‌ସ ତ ପ୍ରକୃଷ୍ଟତାର ଶେଷ ପରିଚୟ

ଗାର୍ଗୀ, ମୈତ୍ରେୟୀ ଓ ଶକୁନ୍ତଳା ଦେବୀଙ୍କ ଭାରତରେ

ଇନ୍ଦିରା ଗାନ୍ଧି, ପ୍ରତିଭା ପାଟିଲ ଓ ମୀରା କୁମାରଙ୍କ

ଭୂଖଣ୍ଡରେ

ନାରୀ ପୁରୁଷ ସମାନ-ବେଳେ ବେଳେ ତା'ଠୁ ଉର୍ଦ୍ଧ୍ୱ

ତଥାପି କାହିଁକି ଟି.ଭି. ଖୋଲୁ ଖୋଲୁ

ଗଣଦୁଷ୍କର୍ମ ଓ ପ୍ରପୀଡନର କାହାଣୀ ?

ଆସନ୍ନ ପ୍ରସବା ନାରୀ ହସ୍‌ପିଟାଲ ପହଞ୍ଚି ନ ପାରିବା।

ଦାନ ମାଝାର ମୃତା ପତ୍ନୀ କୋକେଇଟିଏ ନ ପାଇବା

ଉତ୍କଟ ଦାରିଦ୍ର୍ୟ ଓ ଭୋକର ଭୂଗୋଳରେ

ଦାଦନ ଖଟୁଥିବା

ନିଜ ଜନ୍ମିତ ସନ୍ତାନକୁ ଉଦର ଜ୍ୱାଳାରେ ବିକ୍ରି କରିବା

ଏ କ'ଣ ଆମର ପରିଚୟ ?

ଆନ୍ତର୍ଜାତିକ ମହିଳା ଦିବସରେ

ଗୁରୁବାରୀର ନିରାପତ୍ତା, ନିରନ୍ତି ମୁହଁରେ ଅନ୍ନ

ଓ ପୀଡିତାର ତ୍ଵରିତ ଚିକିତ୍ସା

ସର୍ବତ୍ର ସମତା ଓ ଅନାବିଳ ମମତାର ଜୟ ଜୟ କାର

ନୂତନ ପ୍ରାଣପ୍ରାଚୁର୍ଯ୍ୟର କୌମୁଦୀ ସୌରଭ

ଏକ ନବ ସଂଜୀବନୀରେ ଭରିଉଠୁ ଭାରତ ଭୂଖଣ୍ଡ

ନାରୀର ସମାନ ଅଧିକାର ବାର୍ତ୍ତା ନେଇ

କାଗଜ ଡଙ୍ଗାଟିଏ ଭାସି ଯାଉ ଦିଗ୍‌ବଳୟର

ସେ’ପାରିକୁ ।