ଅନ୍ତହୀନ ବିଳାପ

ନିର୍ଜନତା ବିଳପୁଛି ,

ନିଃସଙ୍ଗ ଜୀବନ ପଥେ ,

ହେଲେ , କିଛି ବି ଶୁଭୁନି ,

ବିଳପି ଉଠୁଥିବା ବେଦନାର ରାଗ,

ନା ଶୁଭୁଛି ସମବେଦନା ଜଣାଉ ଥିବା,

ପବନ ର ସାଏଁ ସାଏଁ ଶବ୍ଦ ,

ନା ଦେଖା ଯାଉଛି ,

ନିର୍ଜନତାର ଦୁଃଖଦ ମୁହୂର୍ତ୍ତକୁ ଅନୁଭବ କରି ,

ମୁଣ୍ଡ ପିଟୁଥିବା ଉତ୍ତାଳ ତରଙ୍ଗର ଦୃଶ୍ଯ ।

ନିର୍ଜନତା ତା ବିଦଗ୍ଧ ରାଗିଣୀର ,

ଆଳାପରେ ସୁର ତୋଳୁଛି,

ହେଲେ ସେ ଭଗ୍ନ ସ୍ବର ,

ବେଦନା ସିକ୍ତ କୋହରେ ହଜି ଯାଉଛି ,

ଯନ୍ତ୍ରଣା ଜର୍ଜରିତ ଦୀର୍ଘ ଶ୍ବାସର, ସିତ୍କାର ହିଁ ଶୁଭୁଛି ।

ଜୀବନର ଚଲାପଥ ସରି ସରି ଆସୁଛି ,

ଶେଷ ସଳିତାର ଶିଖା ପରି ,

ଧାରେ ଅନ୍ଧାର ଛଡା ଆଉ କିଛି ଦୃଶ୍ଯ ହେଉନି ,

ନିର୍ଜନତା ସେମିତି ବିଳପୁଛି । ।

ବେସୁରା ସୁର, କୋହ ଆପ୍ଳୁତ ବେଦନା ,

କିଛି ଅନ୍ଧାର .... ମୂଲ୍ଯହୀନ ଦୀର୍ଘଶ୍ବାସ ,

କେହି ବି ତ ସେଇ ଭଗ୍ନ ସୁରରେ ,

ସାନ୍ତ୍ବନାର ସୁରେ, ସ୍ନେହ ସିକ୍ତ ରାଗିଣୀରେ ,

ସେ ନୀରବ ହୃଦୟରେ ଝଙ୍କାର ତୋଳି ପାରୁନି ,

ନିର୍ଜନତା ସେମିତି ବିଳାପ କରି ଚାଲିଛି ,

ସତେ କି ଯେମିତି ଏକ ଅନ୍ତହୀନ ବିଳାପ । ।