ଅନ୍ବେଷା

----------

ମୁଁ ଖୋଜୁଛି ,ମୋ ପାଇଁ ଚେନାଏ ଆକାଶ ,

ଯେଉଁଠି ନଥିବ ଲୋକ ଦେଖାଣିଆ ସମ୍ପର୍କର ଭିଡ,

ଇଚ୍ଛା ମାନଙ୍କୁ ଜବରଦସ୍ତ ଅବରୁଦ୍ଧ କରି ରଖିବାର ବାଧ୍ୟ ବାଧକତା,

ଅନ୍ତର ରେ ସବୁ ଅସୂୟାକୁ ଚାପିରଖି ମିଛିମିଛିକା ହସ ଖେଳା ମୁହଁ ,

ଖାଲି ମୁଁ ଆଉ ମୁଁ, ସବୁ ମୋର, ମତେ ଚିହ୍ନ , ମତେ ଦେଖ ର ମିଛ ମୁଖା ସବୁ,

କୋରି କୋରି ପାମ୍ପରା କରିଦେଉଥିବା ଅନାହୁତ ବାକ୍ୟବାଣ ଯେତେ,

ସମୟ ସୁବିଧା ଦେଖି ରଙ୍ଗ ବଦଳାଉଥିବା ସାଙ୍ଗସାଥୀ ଦଳ ,

ଦୈହିକ ପ୍ରେମରେ ଉବୁଟୁବୁ ଆକ୍ତାମାକ୍ତା କରି ପକାଉଥିବା ଦାମ୍ପତ୍ୟ ,

କ'ଣ କରିଛ? କ'ଣ ରଖିଛ ଆମ ପାଇଁ ? ପ୍ରଶ୍ନ ପଚାରୁଥିବା ଅପତ୍ୟ ,

ଏ ସବୁ କିଛି ଲୋଡା ନାହିଁ , ଲୋଡ଼ା ନାହିଁ ଏ ଗତାନୁଗତିକ ଜୀବନ ।।

ଶ୍ରାନ୍ତ , କ୍ଳାନ୍ତ, ଜୀବନର ଅପରାହ୍ନରେ ଲୋଡ଼ା ଖାଲି ନିଜ ପାଇଁ

ଟିକିଏ ଅସ୍ମିତା, ଟିକିଏ ଆତ୍ମୀୟତା, ଟିକିଏ ଆତ୍ମବିଶ୍ୱାସର ନିରୁତା ପବନ,

ଚେନାଏ ଆକାଶ ଆଉ ଆପଣା ଅସ୍ତିତ୍ବର ନିର୍ମଳ ଜ୍ୟୋତ୍ସ୍ନାରେ ଜ୍ୟୋତ୍ସ୍ନାୟିତ

ଛୋଟ ଗୋଟେ ରୂପା ଜହ୍ନ ।