ଅନାତ୍ମୀୟ
ଅନାତ୍ମୀୟ
ତୁମେ କେବେ ଅନୁଭବ କରିଛ କି
ଏତେ ଗହଳି ଭିତରେ ବି ନିଜକୁ ଏକଲା,
ସମ୍ପର୍କର ରଜ୍ଜୁରେ ବନ୍ଧା ଆତ୍ମୀୟମାନଙ୍କ ମଧ୍ୟରୁ
ହୁଗୁଳି ପଡୁଥିବା ଖଣ୍ଡେ ଅଡୁଆ ସୂତା |
କେବେ କେବେ ଖୁବ ନାଚାର,
ବିକଳପଣ ଓ ଅସହାୟବୋଧର ଅଣନିଃଶ୍ଵାସୀଭାବରେ
ଜୁଡବୁଡ ଏକ ନାମହୀନ ସତ୍ତା |
କେବେ ନିଜକୁ ଦେଖି ରଖିଛକି
ସେଇସବୁ ସମ୍ପର୍କର ଡୋରିରେ ବନ୍ଧା ଭାବ ଓ ଅଭାବର
ତରାଜୁ ପଣରେ ମପା କିଛି ଅହେତୁକ କଣ୍ଟକିତ ମୁହୂର୍ତ୍ତରେ,
ଏଇ ଯେମିତି ତଣ୍ଟିରେ ଲାଗିଥିବା ମାଛକଣ୍ଟାଟି ଭଳି,
ନା ଢୋକି ହେଉଥାଏ, ନା କାଢି ହେଉଥାଏର ଅବସ୍ଥା |
ସକାଳେ ଓ ସଞ୍ଜରେ ନିଜ ରୂପ-ପରିଭାଷା
ବଦଳେଇ ପାରୁଥିବା ସେଇ ସେଇ ଜୀବାତ୍ମାମାନେ,
ଆଉ ଲଦି ଦେଉଥିବା ନିଜ ନିଷ୍ପତ୍ତିକୁ ତୁମ ଉପରେ
ଜୋର କରି ସାଜିବାକୁ ତୁମ ପରମ ହିତୈଷୀ ଓ କର୍ତ୍ତା |
**************
ଆଃ ! ଅନାତ୍ମୀୟ ବୋଧହୁଏ ଏଇ ଭଳି ଏକ ରୂପ କଥା,
ଫେଣ୍ଟାଫେଣ୍ଟି କିଛି ନିଶ୍ଚିତତା ଓ କିଛି ଅନିଶ୍ଚିତତା,
ସମ୍ପର୍କର କିଛି ନିବିଡତା ଓ କିଛି ଉଦାସୀନତା,
ଅନୁଭବର ପରିପ୍ରକାଶ ଓ ନୀରବତା,
ସର୍ବୋପରି, ତୁମ ଆତ୍ମୀୟତାର ଅବିକଳ ଭିନ୍ନ ଏକ ଚିନ୍ତା |