ଅକୁହା କଥା

ଅକୁହା କଥାଟି ମନର ଭିତରେ

ସଦାବେଳେ ରହିଥାଏ ।

କାହାରି ଆଗରେ ସେ କଥା ଗୋଟିକ

କେବେହେଲେ କହି ନୋହେ ।୧।

ସାତତାଳ ପଙ୍କ ଭେଦ କରି ସିନା

ପଦୁଅଁ ଫୁଟେ ପାଣିରେ ।

ଯେତେ ଭାବିଲେ ବି ଅକୁହା କଥାଟି

କେବେ ବି କହି ନପାରେ ।୨।

ପେଟର ଭିତରେ ଅକୁହା କଥାଟି

ରହି ଗୁଡୁ ଗୁଡୁ ହୁଏ ।

କାହାକୁ କହିବ କେମିତି କହିବ

ଭାବି ଭାବି ମନେ ରହେ ।୩।

କେଉଁ ପ୍ରସଙ୍ଗରେ ଅକୁହା କଥାଟି

ମନେ ଯଦି ଆସିଯାଏ ।

ମନ ବାଆଁରେଇ ଚାଆଁରେଇ ହୋଇ

ତହିଁରୁ ଦୂରେଇ ଯାଏ।୪।

ଅଜାଗା ଘାଆକୁ ଦେଖି ହୁଏ ନାହିଁ

ଦେଖେଇ ବି ହୁଏ ନାହିଁ ।

ଅକୁହା କଥାଟି ଠିକ୍ ସେହିପରି

କେହି କହିପାରେ ନାହିଁ ।୫।

ସଭିଙ୍କ ମନରେ ଅକୁହା କଥାଟି

ବସା ବାନ୍ଧି ଥାଏ ରହି ।

ଯେଉଁଠି ରହିଛି ଅକୁହା କଥାଟି

ସେହିଠାରେ ଥାଏ ରହି ।୬।

ଆଜି କଥା ସିନା କାଲିକି ନଥାଏ

ମନରେ ଅକୁହା କଥା ।

ଘର କରି ନିଜେ ରହି ଯାଇଥାଏ

ମିଛ କେବେ ନୁହଇ ତା ।୭

କାହାରି ଆଗରେ ଅକୁହା କଥାଟି

ଯଦି ତୁମେ କହି ଦେବ ।

ପେଟ ଗୁଡୁ ଗୁଡୁ ନିଶ୍ଚେ କମିଯିବ

ମନ ହାଲୁକା ହୋଇବ।୮।

କା ଆଗରେ ଯଦି ଅକୁହା କଥାଟି

କେବେ କହି ନ ପାରିବ ।

ଯାହାକୁ ଭରସା କରୁଛ ତାହାଙ୍କୁ

ନିଶ୍ଚୟ ତାହା କହିବ ।୯।