ଅଜା ଓ ମାଙ୍କଡ

ବଇଶାଖ ମାସ ଭାରି ଗୁଳୁଗୁଳି

ଅଜା ଶୋଇଥିଲେ ତୋଟାରେ,

ପାନ ଖାଉଥିଲେ ପାକୁଆ ପାଟିରେ 

ବଟୁଆଟି ଥିଲା ପାଖରେ ।

ପାଖେ ରଖିଥିଲେ ବଙ୍କୁଲି ବାଡିଟି

ଟୋପି ଥିଲା ମୁଣ୍ଡ ଉପରେ,

ଆମ୍ବଗଛ ଡାଳେ ପାତି ମାଙ୍କଡଟା 

ଦେଖୁଥିଲା ସବୁ ମଜାରେ ।

ଥଣ୍ଡା ପବନରେ ଲାଗିଗଲା ନିଦ

ଅଜା ତ ମାରିଲେ ଘୁଙ୍ଗୁଡି,

ଧୀରେ ଓହ୍ଲାଇଲା ଗଛରୁ ମାଙ୍କଡ

ନେଇଗଲା ବଙ୍କୁଲି ବାଡି ।

ଖେଁ ଖେଁ ହୋଇ ହସିଦେଇ ଥରେ

ଚାହିଁଦେଲା ଚାରି କଡକୁ,

ମୁଣ୍ଡରେ ଯତନେ ପିନ୍ଧିଲା ଟୋପିଟି

ଚଢିଗଲା ଗଛ ଡାଳକୁ।

ଦୂରେଥାଇ କୁନା ସବୁ ଦେଖୁଥିଲା

ମାରିଲା ଟେକାଟା ଗଛକୁ,

ଗଛରୁ ପଡିଲା ଆମ୍ବଟିଏ ଖସି

ଅଜାଙ୍କ ଥନ୍ତଲ ପେଟକୁ ।

ଚାଇଁକରି ନିଦ ଭାଙ୍ଗିଲା ଅଜାଙ୍କ

ଧଡପଡ ଉଠି ପଡିଲେ,

ରାଗେ ତମତମ ଗରଜନ କରି

ବାଡିଟିକୁ କେତେ ଖୋଜିଲେ ।

ଦେଖିଲେ ମାଙ୍କଡ ଗଛରେ ବସଛି

ଧରିଛି ବଙ୍କୁଲି ବାଡିଟି,

ଯତନେ ଟୋପିଟି ପିନ୍ଧିଛି ହରଷେ 

ଡେଉଁଛି ଡାଳରୁ ଡାଳଟି ।

ଅଜା ପାଟି କଲେ ଆରେ କୁନା କୁନି

ଧାଇଁ ଆସ ଧାଇଁ ଆସରେ,

ଦୁଷ୍ଟ ମାଙ୍କଡଟା ଗଛରେ ବସିଛି 

ତଡି ଦିଅ ତଡି ଦିଅରେ ।

----------------

ଶରତ କୁମାର ଦାସ