ଅଗ୍ରପୂଜ୍ୟ ଶ୍ରୀ ଗଣେଶ

ଜୟ ଜୟ ଶ୍ରୀଗଣେଶ ଗଣପତି ବାବା,

ମାତା ତୁମ ପାରବତୀ ପିତା ମହାଦେବା ।

ଗୃହ ମଧ୍ୟେ ମାତା ଥିଲେ ଜଗିଥିଲ ଦ୍ଵାର,

ପିତାଙ୍କୁ ନଚିହ୍ନି ସଙ୍ଗେ କରିଲ ସମର ।

ସମରର ଅନ୍ତ ହେଲା ଅତି ଦୁଃଖମୟ ,

ତବ ଶିର ଛେଦି ପିତା ଲଭିଲେ ବିଜୟ ।

କ୍ରନ୍ଦନ କରିଲେ ମାତା ହୋଇ କ୍ରୋଧବଶ,

ହସ୍ତୀ ଶିର ଯୋଡ଼ି ପିତା ଦେଲେ ଜୀବନ୍ୟାସ।

ଅଗ୍ରପୂଜ୍ୟ ହେଲ ତହୁଁ ପିତା ବର ବଳେ,

ସ୍ଵର୍ଗପୁରୁ ଦେବଗଣ ପୁଷ୍ପ ବୃଷ୍ଟି କଲେ ।

ପର୍ଶୁରାମ ପର୍ଶୁ ଅସ୍ତ୍ରେ କଲେ ଦନ୍ତ ଭଗ୍ନ,

ତବ ଆଶିଷରୁ ଦୂର ହୋଇଥାଏ ବିଘ୍ନ ।

ମୂଷିକ ବାହନ ତୁମେ ରିଦ୍ଧି ସିଦ୍ଧି ପତି,

ତୁମରି ପୂଜନେ ମିଳେ ଚତୁର୍ବର୍ଗ ପ୍ରାପ୍ତି ।