ଆଉ କେବେ ମିଛ କହିବି ନାହିଁ

ବାଟି ଖେଳିବାକୁ     ଭଲ ଲାଗୁଥିଲା

 ହେଲେ ମୋ ପାଖରେ ବାଟି ନ ଥିଲା।

ଦେଖିଲି ସେଦିନ   ମସଲା ଡବାରେ 

  ମାଆ ଦି ଟଙ୍କିଆଟେ ରଖିଥିଲା।।

ସ୍କୁଲରୁ ଆସିକି     ଦି ଟଙ୍କିଆ ନେଇ

  କାହାକୁ ନ କହି ଦୋକାନ ଗଲି।

ପାଞ୍ଚଗୋଟି ବାଟି    ମିଠେଇରୁ କିଛି

  ଦୋକାନରୁ ଯାଇ କିଣି ଆଣିଲି।।

ମିଠେଇ ବାଣ୍ଟିଲି    ବାଟି ବି ବାଣ୍ଟିଲି

  ସାଙ୍ଗ ମେଳେ ମିଶି ବାଟି ଖେଳିଲି।

ମାଆ ପଚାରିଲା    ନେଇଚୁକି ଟଙ୍କା 

 ସଞ୍ଜରେ ଯେବେ ମୁଁ ଘରେ ଫେରିଲି।।

'ନାହିଁ ' କରିଦେଲି   ରାଗିଗଲା ମାଆ

  କାଠ ଖଣ୍ଡେ ଧରି ଉଞ୍ଚେଇ ଦେଲା।

ଉଞ୍ଚେଇଲା ସିନା   ମାରିଲା ନାହିଁ ସେ

  ଦି ଆଖିରୁ ଲୁହ ଗଡୋଉଥିଲା ।।

ମୋ ବିବେକ ମୋତେ ଧିକ୍କାର କରିଲା

  କାହିଁକି କହିଲି ମିଛ କଥାଟେ ।

କହିଲି ମାଆଲୋ   ମୁଁ ନେଇଛି ଟଙ୍କା 

  ହସିକରି ଏବେ କହ ପଦୁଟେ।।

କହିଲା ମୋ ମାଆ  ଚୋରି କଲୁ ତୁହି

 ହେଲେ ସେଥିପାଇଁ ନାହିଁ ମୋ ଦୁଃଖ ।

ମୋ ପୁଅଟା ମୋତେ  ମିଛ କହିଦେଲା

  ସେଥିପାଇଁ ମନେ ହେଉଛି ଦୁଃଖ ।।

ସେଇଦିନ କଥା   ଏବେ ମନେ ଅଛି

  ମନରେ ଗଭୀର ରେଖା ଟାଣିଛି ।

ଯାହା କରେ ପଛେ  ଦୁଃଖ ଦେଲାଭଳି

  ମିଛ କହିବିନି ରାଣ ଖାଉଛି ।।