ଆତ୍ମତୃପ୍ତି

ଶଶାଙ୍କ ଶେଖର ରାୟ

ଡେଣାଝାଡି ଉଡିବାକୁ ଦିଅ ମୋତେ

କପୋତଟିଏ ପରି ଖୋଲା ଆକାଶରେ

ଦୁଃଖ ଜଞ୍ଜାଳର ଦଉଡି ଖୋଲିଦିଅ

ଦଉଡିବି କଅଁଳା ବାଛୁରୀ ପରି ଗାଁ ଦାଣ୍ଡରେ ।

ଆମ୍ଵଡାଳେ ବସି ନିରୋଳାରେ ହଜିଯିବି

ଗାଈଆଳ ଟୋକାର ବେସୁରା ସଙ୍ଗୀତର ମୁର୍ଛନାରେ

ଦିନରାତି ଖଟିଖଟି କ୍ଲାନ୍ତ କୃଷକଟିଏ ପରି

ସଂଧ୍ୟାପ୍ରହରୁ ଶୋଇଯିବି ଅଚିନ୍ତା ନିଦରେ ।

ଶାନ୍ତ ସରଳ ନିର୍ବୋଧ କଅଁଳା ଶିଶୁ ଭଳି

ଖିଲିଖିଲି ହସ ଲାଗିଥାଉ ସଦା ଓଠରେ

ନିରବେ ଝରଣା ସାଜି ଆଗକୁ ବହିଯିବି

ପଥରର ବାଟ ଭାଙ୍ଗି ମିଶିଯିବି ନୀଳ ସାଗରେ ।

ଅଳ୍ପେ ସନ୍ତୁଷ୍ଟ କରିଦିଅ ମୋତେ ଏଠି

କିଛି ନୁହେଁ ମୋର ବ୍ୟାକୁଳିତ କାହିଁ ମୁହିଁ ଅଯଥାରେ ।

ତୁଳା ଠାରୁ ହାଲୁକା କରି ମନ ମୋର

ଆରେ ଉଡାଇନିଅ ଆକାଶର ବହୁ

ଉଚ୍ଚରେ

ସବୁଜ ବନାନୀର କୋଳେ

ଲୋଟିଗଲେ ଅବଶ ଶରୀର ଥରେ

ସକାଳ ସଂଧ୍ୟାର କଅଁଳ ସୂରୁଜ

ବୋଳିଦିଏ ପ୍ରଶାନ୍ତିର ନାଲି ଅଭିର ମୋ ମଥାରେ ।

ମୋ - 7377197999

ବଟରପଡା ରାଜକନିକା କେନ୍ଦ୍ରାପଡା