ଆତ୍ମଲୀନ ନିସଂଗତା

ଭଲଥିଲା ସେଇ ଆଦିମତା-

ପଥର-ଗୁହାର ଏକାଂତ ନିଃସଂଗତା,

ବନ୍ଯ-ପଶୁ ପରି ଫଳ-ମୂଳ ଖାଇ,

ବୃକ୍ଷର ବକ୍କଳ-ବାସେ-

ପ୍ରିୟାର ଯୌବନ ସଂପଦ,

ଅର୍ଦ୍ଧ-ଅନାବୃତା....

ଦୂର-ବହୁଦୂରେ-

   ଦୃଷ୍ଟିର ପରିଧିରେ,

ବନ-ରାଜି ଶ୍ଯାମଳ ସୁଷମା,

ଝର-କୂଳେ ଝରା-ବନଫୁଲେ,

ବିସ୍ତୀର୍ଣ୍ଣ-ବିଛଣା,...

ଦୂରେ-କେଉଁ ଲତା-କୁଞ୍ଜେ-

ବନ-ପକ୍ଷୀ'ଟିର,

ପ୍ରେମ-ନିବେଦନେ,

ମଧୁର-କାକଳୀ,...

ପକ୍ଵ-ଫଳ ବୃକ୍ଷ-ଶିଖ'ଡାଳେ,

ପ୍ରୀୟା'ର ଲଭିଲା-ଆଖି,

ଦେହେ'ଥିଲା ଅପର୍ଯାପ୍ତ ବଳ,

କ୍ଷୁଧା-ନିବାରଣେ,

ପ୍ରୀୟା'ର ଜଠରୁ,....

ମୁକୁଳା-ଆକାଶ ତଳେ ଲଂଗଳା-ପୃଥିବୀ,

ସରଳ ଆଦିମ-ନର-

ଉଲଂଘ-ଶିଶୁ ସମ,.....

ପେନ୍ଥା-ପେନ୍ଥା ବନ-ଫୁଲେ ପ୍ରିୟାର କବରୀ,

ବାକ୍-ହୀନ ପୃଥିବୀରେ-

    ଇଂଗିତ'ର ଭାଷା,

ସଂଚରୁ-ଥିଲା ହୃଦୟ'ରୁ ଆନ ହୃଦୟକୁ,...

ମୁକୁଳା ଓ ନିଷ୍କପଟ ପ୍ରେମ-

     ଖୋଲା-ବହି'ଟି ପରି-

ତନ୍ନ-ତନ୍ନ କରି,

ପଢି ହେଉ'ଥିଲା.......

ଆଜି ଏଠି,

ହାଉ-ଯାଉ ଗହଳିରେ-

ସଂପର୍କର ସଂଜ୍ଞା-ସବୁ ଅଷ୍ପଷ୍ଟ,

ବାତ୍ସଲ୍ଯ-ମମତା କାଂଦେ-

କେଉଁ ଅନାଥାଶ୍ରମରେ-

     ଏକାଂତ ବିଜନେ......

ଓହ-ରହ ତୃଷାତୁରା-

ସ୍ତ୍ରୀ'ର ଓଠରେ-

ଲିପ୍-ଷ୍ଟିକ୍'ର,

ବହଳ-ପ୍ରଲେପର ଲାଲିମା,....

ଦେହ ତଳେ ମନଟିଏ,

ଗୁଣୁ-ଗୁଣୁ ଗାଉଥିବା,

ପ୍ରେମ ନିବେଦନର,

ମୃଦୁ-ସ୍ୱର-

ସ୍ଵାମୀଂକ'ର ମଚ-ମଚ ଦ୍ରୁତ-ପାଦ,

ଯୋତା-ଶବ୍ଦ ତଳେ,

ହୋଇ'ଯାଏ ବିଲୀନ.....

ମୋବାଇଲ କାଚ-ତଳେ,

କେଉଁ ଏକ ଅପରିଚିତ-

      ଅଂଧାରି-ଇଲାକା,

ଦୂର-ଦର୍ଶନ ପରଦା'ରେ,

ପ୍ରସାଧାନର ପ୍ରାଚୁର୍ଯ୍ୟରେ,

ଦୟନୀୟ ନିଃସଂଗ ମଣିଷ.......

କପିଳର କୋପାନଳେ,

ସଗର-ବଂଶ ପରି,

ଜୀବଂତ-ଦଗଧ କରି,

କାହିଁକି ଦେଉଛ ପ୍ରଭୁ-

ଯମର ଯଂତ୍ରଣା,

ମୁକ୍ତି-ଦିଅ ବାରେ.......