ଆସୁଛି ରଙ୍ଗର ପର୍ବ

ରଙ୍ଗ ଫଗୁଣରେ ସାତ ରଙ୍ଗ ଭରି

ରଙ୍ଗର ପରବ ହୋଲି,

ସକଳ ମନରୁ ଭେଦା ଭେଦ ଭୁଲି

ପାଳିବା ମଉଜେ ହୋଲି ।

ରଙ୍ଗ ବସନ୍ତର ମନ୍ଦ ମନ୍ଦ ଛୁଆଁ

ପ୍ରୀତିର ଲାବଣ୍ୟ ଭରେ,

ଦୋଳବିମାନରେ ବିଜେ ମହାପ୍ରଭୁ

ଧରି ରାଧାରାଣୀ ଫଗୁ ଦଶମୀରେ ।

ପୂର୍ଣ୍ଣମୀର ପରେ ଆସେ ରଙ୍ଗ ହୋଲି

ମନ ଆନମନା ହୁଏ,

ରାଧାକୃଷ୍ଣ ପ୍ରେମେ ସଭିଏଁ ମାତନ୍ତି

ମାଦକତା ଭରି ଯାଏ ।

ପ୍ରେମର ପରବ ଏ ହୋଲି ଦିନଟି

ମନ ହୋଇଥାଏ ଓଦା,

ରଙ୍ଗର ଫଗୁଣ ଆଣିଛି ମେଲଣ

ମଧୁମକ୍ଷୀ ଖୁସିରେ ଭ୍ରମନ୍ତି ସଦା ।

ରାଧାକୃଷ୍ଣଙ୍କର ଅପୂର୍ବ ମିଳନ

ହୃଦୟେ ଜଗାଏ ଶାନ୍ତି,

ଅବଶ ମନଟା ପ୍ରେମ ପିୟୁଷରେ

ଭରିଦିଏ ଦେହେ ତାତି ।

ରଙ୍ଗ ବୋଳାବୋଳି ଆନନ୍ଦ ଲହର

ପୁରେ ପୁରେ ଲାଗିଥାଏ,

ପିଠା ମିଠା ଖିରି ଖେଚୁଡ଼ିର ବାସ୍ନା

ମର୍ତ୍ୟ ପୁରେ ଛୁଟିଥାଏ ।

ଜଗତକରତା ଶ୍ରୀକୃଷ୍ଣ ମୋହନ

ଦିଅନ୍ତୁ ହୃଦୟେ ପ୍ରୀତି,

ଏ ରଙ୍ଗ ପରବ ସଦା ଖୁସି ଦେଉ

ରାଧାକୃଷ୍ଣ ପ୍ରେମେ ମାତି।