ଆଶ୍ୱାସନା

ଅଶାନ୍ତ ହୃଦୟେ ଶାନ୍ତି ବୀଜ ବୁଣେ 

ଆଶ୍ୱାସନା ଭରା ବାଣୀ, 

ପ୍ରେରଣା ଯୋଗାଏ ଲେଖିଯିବା ପାଇଁ 

ସଫଳତାର କାହାଣୀ l

ମାଆ ଆଶ୍ୱାସନା ଶିଶୁର ପାଟିରେ 

ଦରୋଟି କଥା କୁହାଏ, 

ଅଝଟପଣିଆ ଦୂର କରିଥାଏ 

ବୁଝିବା ଶକ୍ତି ବଢାଏ l

ପିତା ଆଶ୍ୱାସନା ବଳରେ ଶିଶୁ ଟି 

ଆଗକୁ ତାପାଦ କାଢ଼େ, 

ଜୀବନର ବାଧା ଦୂର କରି ସିଏ 

ସଂସାର ର ସିଢି ଚଢେ l

ଶିକ୍ଷାର୍ଥୀ ବୟସେ ବିଦ୍ୟାଜ୍ଞାନ ପାଇଁ 

ଗୁରୁଙ୍କର ଆଶ୍ୱାସନା, 

ନୂଆରାହା ଧରି ଆଗେଇ ଯିବାକୁ 

ଦେଇଥାଏ ଯେ ପ୍ରେରଣା l

ଯୌବନ ସମୟେ ବନ୍ଧୁ ଆଶ୍ୱାସନା 

ସୁଗମ ବାଟ ଦେଖାଏ, 

କୁସଙ୍ଗ ସହିତ ସଙ୍ଗୀ ହୋଇଗଲେ 

କୁପଥଗାମୀ କରାଏ l

ଜୀବନ ସାଥୀର ଆଶ୍ୱାସନା ପଦ 

ସଂସାର ସୁଗମ କରେ, 

ଜୀବନ ଜଞ୍ଜାଳ ଲାଗେନା ବିଷମ 

ମଧୁମୟ ଛନ୍ଦ ଭରେ l

ଅସୁସ୍ଥ ଦେହରେ ଜୀବନ ସଞ୍ଚାରେ 

ଚିକିତ୍ସକ ଆଶ୍ୱାସନା, 

ଔଷଧ ଠାରୁ ବି ବେଶୀକାମ ଦିଏ 

ତାଙ୍କର ସେ ପ୍ରବୋଧନା l

ଜୀବନର ପ୍ରତି ପଦେ ଆଶ୍ୱାସନା 

ଆଶାର ଜ୍ୟୋତି ଦେଖାଏ, 

ଆତ୍ମହତ୍ୟା ପରି ଜଟିଳ ଭାବନା 

ମନରୁ ଦୂର କରାଏ l

ମନର କ୍ରୋଧ ଓ ବିଷାଦ ବିବ୍ରତ 

କରିପାରେ ଶାନ୍ତ ସିଏ , 

ଆଶ୍ୱାସନା ବାଣୀ ସୁରଧୂନୀ ସମ 

ମନ ଦ୍ୱନ୍ଦ୍ୱ ଟାଳି ଦିଏ l

ସବୁ ଧନ ଠାରୁ ଆଶ୍ୱାସ ବଚନ 

ଶ୍ରେଷ୍ଠ ସଦା ହୋଇଥାଏ, 

ସୁଗମ କରାଏ ଜୀବନ କୁ ସେହି 

ପଥଦ୍ରଷ୍ଟା ବନିଯାଏ l