ଆସ ମାତେ ଦୁର୍ଗତିନାଶିନୀ

ନବକାଶ, ନବମଲ୍ଲି, 

କୁନ୍ଦ ଓ କୁମୁଦ,

ଶେଫାଳି ମାଳତୀ 

ବନେ ଶୁଭ୍ର ସପ୍ତଚ୍ଛଦ,

ଶୁଭ୍ର ରଙ୍ଗେ ଶ୍ୱେତବର୍ଣ୍ଣା

ଆଜି ଏ ଧରଣୀ,

ଶାରଦୀୟ ଶୋଭା

ଜନ ମନ ନିଏ କିଣି ॥

ବହେ ମନ୍ଦ ଶୀତଳ ସମୀର

ପୁଲକିତ ସର୍ବ ତନୁମନ,

ମେଘମୁକ୍ତ ନଭେ ଆଜି ହସେ

ଅଶିଣର ତୋଫା ରୂପା ଜହ୍ନ ॥

ସରୋବରେ ମରାଳଙ୍କ 

ହଂସଧ୍ୱନି ସ୍ୱନ,

କଳି ପାଶେ ଅଳି କରେ 

ମଧୁର ଗୁଞ୍ଜନ,

ପୁରପଲ୍ଲି ସହର ନଗର

ନାନା ରୂପେ ଆଜି ସୁଶୋଭିତ,

ପୂଜାସ୍ଥଳେ ସୁରମ୍ୟ ତୋରଣ

ନାନା ରଙ୍ଗେ ଆଜି ଆଲୋକିତ ॥

ଆସ ମାତେ ଶୈଳପୁତ୍ରୀ

ହେ ବ୍ରହ୍ମଚାରିଣୀ,

ଚନ୍ଦ୍ରଘଣ୍ଟା ହେ କୁଷ୍ମାଣ୍ଡା,

ସ୍କନ୍ଦମାତା ଆହେ ଯଶସ୍ୱିନୀ,

ହେ କାଳରାତ୍ରି, କାତ୍ୟାୟନୀ,

ମହାଗୌରୀ ସିଦ୍ଧିପ୍ରଦାୟିନୀ ॥

ଆସ ମାତ ଆସ ଅବତରି

ଏ ଧରା ଧାମରେ

ଦୂର କର ସକଳ ଦୁର୍ଗତି

ଆଗୋ ମାତେ ଦୁର୍ଗତିନାଶିନୀ ।।