ଆସ ମା ଧରାଧାମେ
ଆସ ମା ଧରାଧାମେ
ଆସ ମାଆ ଧରାପରେ ।
ସସାଗରା ଧରା ଚାହିଁଅଛି ପରା
ତୁମ ଆଗମନୀ ପାଇଁ,
ଆସ ମାଆ ଆସ ସରଗୁ ଓହ୍ଲାଇ
ଆଉ ଡେରି କରନାହିଁ ।
ତୁମପାଇଁ ଆଜି ରଖିଛି ପ୍ରକୃତି
ସଜାଇ ଏ ଧରାଧାମ,
ମାଟିରୁ ଆକାଶ ଆକାଶରୁ ମାଟି
ସବୁଠାରେ ତୁମ ନାମ ।
କାଶତଣ୍ଡି କରେ ଆଲଟ ଚାମର
ଆକାଶ ଧରିଛି ଛତ୍ରୀ,
ରୂପାଜହ୍ନ ଜାଳେ ରୋଷଣୀ ମାଆଗୋ
ଉଜାଗର ରହି ରାତ୍ରି ।
ଗଙ୍ଗଶିଉଳିର ଗାଲିଚା ବିଛାଇ
ପବନରେ ଭରି ବାସ,
ଏ ସାରା ସଂସାର ଡାକୁଛି ତୁମକୁ
ଆସ ମାଆ ତୁମେ ଆସ ।
ଫୁଲ ହେଉଛନ୍ତି ଫୁସୁରୁ ଫାସର
ଦେବାକୁ ତୁମକୁ ଅର୍ଘ୍ୟ,
ଅପରାଜିତାକୁ ଅଗସ୍ତି,ବଧୁଲି
କୁମୁଦ,କମଳ ବ୍ୟଗ୍ର ।
ଶକ୍ତି ପ୍ରଦାୟିନୀ,ଦୁର୍ଗତି ନାଶିନୀ
ଜୟ ମାଆ ଦୁର୍ଗା ଜୟ,
ତୁମ ଆଗମନେ ଧରଣୀ ବକ୍ଷରୁ
ପାପରାଶି ହେଉ କ୍ଷୟ ।
ଧନୀଠୁ ଗରିବ ପିଲାଠାରୁ ବୁଢ଼ା
ସଭିଁଏ ସଂନ୍ତ୍ରସ୍ତ ଆଜି,
ତୁମ ଆଗମନେ ଦୂରହେଉ ଭୟ
ଯାଉ ଏ କରୋନା ପାଜି ।
ଯୁଗେଯୁଗେ ମାଆ ବିପଦବେଳରେ
ଆସତୁମେ ଅବତରି,
ସେହିଶୁଭବେଳା ଉପଗତ ଏବେ
କରନାହିଁ ଆଉ ଡେରି ।
ତୁମ ଆଗମନେ ଫୁଟିଉଠୁ ମାଆ
ଦୁଃଖିର ଓଠରେ ହସ,
ଅନ୍ୟାୟ ବିରୁଦ୍ଧେ ଲଢ଼ିବା ପାଇଁକି
ଦିଅ ମା ତାକୁ ସାହାସ ।
ଚାରିଆଡ ମାଆ ସ୍ୱଚ୍ଛ ତୁମପାଇଁ
ଚାରିଆଡ ସୁନିର୍ମଳ,
ମନକୁ ଆମର ସ୍ୱଚ୍ଛ କର ମାଆ
ଏତିକି ମାଗୁଣୀ ମୋର ।