ଆସ କରିବା ରାଜନୀତି

ଗାଁରେ ରଡୁଛି ଗଧ

ବଣ ଭୂଆଁ ବୋଲେ ଓଧ

ସରକାର ସବୁ ବାଣ୍ଟୁଛି ଚାଷୀକୁ

ହଉ ତୁ କିଆଁ ନିର୍ବୋଧ ।

ଧାଆଁ ନା ବିଲକୁ ମାଧ

ଚାଷରେ କି ଅଛି ଲାଭ ?

ନାଁଟା ଗଡୁଛି ଚାଷୀ ତାଲିକାରେ

ଋଣ କଲେ ଭାରି ଶୁଭ ।

ବୁଢାଏ ଶୁଂଘନ୍ତି ଗଦ

ଟୋକାଏ ଭସାନ୍ତି ମଦ

ଚାଷୀକୁ ମିଳିବ ସ୍ମାର୍ଟଫୋନ

ବନ୍ୟା ବାତ୍ୟାକୁ ଦେଇ ବରାଦ ।

ଟଙ୍କାରେ ଚାଉଳ ଚାଷୀକୁ ମିଳଇ

ଅମଳ ଖଳାରେ ମୂଷା ଖାଉଥାଇ

ଧୋଇ ମରୁଡ଼ିର ସହାୟତା ରାଶି

ବାବୁଙ୍କ ଖାତାରେ ଯାଉଥାଏ ପଶି ।

ତାଲିମ ନିଅନ୍ତି ବେକାରି ବାପୁଡା

ଔଷଧୀୟ ବୃକ୍ଷ ଉଦ୍ୟାନ କୃଷି

ଛତୁ ମାଛ ଚାଷ ଭାରି ଖୁସି ବାସି

ହାତେଇବା ପାଇଁ ସବସିଡି ରାଶି ।

ବାହା ବାହା ନିଏ ସରକାର ବସି

ଉନ୍ନତ କିସମ ଆଧୁନିକ ଯନ୍ତ୍ରପାତି

ଲଙ୍ଗଳ ହଜିଲା ଟ୍ରାକ୍ଟର ଚାଲିଲା

ସୁନାର ଫସଲେ ଦେଶର ବଢ଼ିବ ଖ୍ୟାତି ।

ଅଧିକ ଅମଳ ଲୋଭରେ ପାଗଳ

ରସାୟନ ସାରେ ବନ୍ଧ୍ୟା ହେଲାଣି ମାଟି

ବଇଦ ପାଖରେ ପେଟ ରୋଗୀ ଭିଡ଼

ଯୋଜନା ସବୁ ଯାଉଛି ଫସର ଫାଟି ।

ରାଜନୀତି କଳେ ଚାଷୀ ହୁଏ ପେଶି

ହଳ ଲଙ୍ଗଳଠୁ ଚାଷ ତାଙ୍କ ବେଶି

ଋଣ ଭାରେ କରେ ଆତ୍ମହତ୍ୟା ଚାଷୀ

ଖୁସିର ସଂସାର ଯାଏ ତାର ଭାସି ।

ଭୋଟ ବେଳକୁ ଲଘୁ ଚାପ ନେଇ

ଗାଁକୁ ଆସନ୍ତି ମନ୍ତ୍ରୀ

ତୁହାକୁ ତୁହା ବରଷା ଭଳିଆ

ଘୋଷଣା କରନ୍ତି ବଦଳିବ ଚାଷ ନୀତି ।

ଚାଷୀକୁ ମିଳିବ କିସାନ କାର୍ଡ଼

ଇନ୍ଦିରା ଆବାସ ଛତା ଯୋତା ପାଇଖାନା

ସାଇକେଲ ଚଢ଼ି ଝିଅ ଯିବ ପଢ଼ି

ପୁଅ ଲାପଟପେ ଡେଇଁବ ବିଲୁଆ ନନା ।

ଅଧା ପାଠୁଆ ପୁଅଟା ତାହାର

ଜିଦ୍ ଧରିଛି ରୁଷି

ସ୍ମାର୍ଟ ଫୋନଟେ ତା'ପାଇଁ ନକଲେ

ଦାଦନ ଯିବ ସେ ଖସି ।

କୋଦାଳ ଛାଡ଼ିକି କଣ କରିବ

ଚାଷୀ ପୁଅ ଭାବେ ବସି

ଖରଚ ବେଶିକୁ ଫସଲ ନିଅଣ୍ଟ

ଚାଷେ ରକତ ଯାଉଛି ଭାସି ।

ଦଇବ ଚଡ଼କ କମ୍ ଥିଲା କି !

ମହଙ୍ଗାଇ ମାରେ ନିତି

ବିଷ ପିଇ ଆଉ ଦବନି ଜୀବନ

ବଦଳିଛି ମତି ଗତି ।

ଠେକାକୁ ହକାଳି ଗାନ୍ଧୀ ଟୋପି ପିନ୍ଧି

କରିବ ସେ ରାଜନୀତି

ଭୋଟ ଫସଲ କାଟିବ ଖୁସିରେ

ଦେଶର ହେବ କି ଗତି ?