Library
Profile
ଆମକୁ ଆଶିଷ ଦିଅ
ଆମକୁ ଆଶିଷ ଦିଅ
ସେନେହ ମମତା ସରାଗ ସମତା
ସବୁ ଲାଗେ ମିଛ ପରି
ଶରତ ଆସିଲେ ମରତକୁ ତୁମେ
ଆସିଥାଅ ଅବତରି
ମାଆ ତୁମେ ଏଠି ସତ
କରୁଣାମୟୀ ଗୋ ତୁମରି ଚରଣେ
କୋଟି କୋଟି ଦଣ୍ଡବତ ।।
ଗ୍ରୀଷମ ଫେରିଲା ବରଷା ଫେରିବ
ବସିଥିଲୁ ଆମେ ଚାହିଁ
ତୁମକୁ ଛାଡିଲେ ଆଉ କଥା ଏବେ
ମନରେ ଆମରି ନାହିଁ
ଖୁସି ଆଜି ଧରା ଧାମେ
ତୁମ ପାଦ ପୂଜା କରିବା ପାଇଁକି
ଶେଫାଳି ରଖିଛୁ ଆମେ ।।
ସଫା ଦିଶିଲାଣି ଆକାଶରେ ଜହ୍ନ
ତୁମେ ତ ଆସୁଛ ବୋଲି
ଟୁବି ଗଡିଆରେ ସରମୀ କଇଁଟା
; ହସିଲାଣି ମନ ଖୋଲି
କେତେ ଗପ କେତେ କଥା
ମନଟା କାହାର ଫୁଲି ଫୁଲି ନାଚେ
ନଇଁଯାଏ କା'ର ମଥା ।।
ନଈପଠା ପରେ କାଶଫୁଲ ଗାଏ
ତୁମ ଆବାହନ ଗୀତି
ତୁମରି ଖୁସିରେ ବାରି ବଗିଚାରେ
ଜହ୍ନି ଫୁଲ ଫୁଟେ ନିତି
ମଞ୍ଜୁଆତି ଫୁଟେ କେତେ
ଦେଖ ମାଆ ଦେଖ ଶାଗୁଆ ଲହରୀ
ଖେଳେ ଚାଷୀ ଧାନକ୍ଷେତେ ।।
ପୁରରେ ପଲ୍ଲୀରେ ସବୁରି ମୁହଁରେ
ଏବେ ଖାଲି ତୁମ ନାଆଁ
ଆସି ଆମ ପାଶେ ଧୂପ ଦୀପ ପୂଜା
ଘେନ ଗୋ ଶୁଭଦା ମାଆ
ଆମରି ଶରଧା ନିଅ
ମମତାମୟୀ ଗୋ ଦେବୀ ଦଶଭୁଜା
ଆମକୁ ଆଶିଷ ଦିଅ ।।
