ଆମ ଗାଆଁ ଝିଅ
ଆମ ଗାଆଁ ଝିଅ
ଆମ ଗାଆଁ ଝିଅ ସିଏ କେଡ଼େ ନିରିମାଖୀ
ଶର୍ଫରୀ ସମାନ ତା'ର ଡିମା ଡିମା ଆଖି ,
ନୂଆ ନୂଆ ପୃଥିବୀରେ ଫୁଲ ସିନା ଫୁଟେ
ସପନ ସେ ଦେଖୁଦେଖୁ ନିତି ନିଦ ତୁଟେ ।
ପୂର୍ବାକାଶେ ସିନ୍ଦୂରା ତ ଶୀଘ୍ର ଯାଏ ଫାଟି
ଅଲରାକେଶକୁ ତାର ପଛ ପଟେ ଛାଟି ,
ଚୁଲି ଗର୍ଭେ ଠେଲିବାର ଅଛି ଜାଳକାଠ
କେମିତି ବା ଦି'ଅକ୍ଷର ପଢ଼ି ଥାନ୍ତା ପାଠ !
ଭାତଶାଗ ସଂସାରରେ ବେଳ କାହୁଁ ମିଳେ
ବେଶଭୂଷା ପାଇଁ ଭଲା ତର ନାହିଁ ତିଳେ ,
ବଦଳିଲେ ଦିନବାର କେତେ ଯାଇ ଆସି
ଘଟଣା ବି ଘଟେ ସିନା ହୋଇଯାଏ ବାସି ।
ରାଜନୀତି ବ୍ୟଭିଚାର ହତ୍ଯା ଓ ଧର୍ଷଣ
ଅଗୋଚର କିଏ କେତେ ସହଇ କଷଣ ,
ଜନ ବିସ୍ଫୋରଣ ସାଥେ ପ୍ରଦୂଷଣ କଥା
ଏତେସବୁ ଜଞ୍ଜାଳରେ ଖେଳାଏନି ମଥା ।
ନିଥର ତା' ବନ୍ଦଓଠେ ଗୀତ ଗାଉଗାଉ
ଦାଣ୍ଡ କଥା ଜାଣିବାରେ ସକ୍ଷମ କି ଆଉ ,
ପେଟପାଟଣାକୁ ନେଇ ଘରକାମେ ଯୁଟେ
ମାଛ ପରି ଭାତ ସତେ ହାଣ୍ଡି ମଧ୍ୟେ ଫୁଟେ ।
ପ୍ରସନ୍ନ କୁମାର ମାଦଳା