ଆମ ଚୁଲି ହାଣ୍ଡି

ଚୁଲିରେ ଦେଖ ମା କାଠ ଜାଳିଛି,

ନିଆଁ ଦାଉ ଦାଉ ହୋଇ ଜଳୁଛି ।

ଚୁଲିପରେ ପାଣି ହାଣ୍ଡି ରଖିଛି,

ହାଣ୍ଡି ପରେ ଦେଇ ଚାପା ଘୋଡ଼ାଇ ଅଛି ।

ପାଣି ଟକ ଟକ ଫୁଟିଲେ ତହିଁ,

ମା ଚାଉଳ ପକାଇ ଦେବ ଗୋଳାଇ ।

ଗବଗବ ହୋଇ ଭାତ ଫୁଟିବ,

ଭାତ ରାନ୍ଧି ମା' ପରଷିଦେବ ।

ପିଲା ଛୁଆ ମୁଖେ ଦେଇ ଆହାର,

ହସଖୁସି ମନେ ଚଳେ ପରିବାର ।

ଶୀତଦିନେ ପୁଣି କାଲୁଆ ଶୀତ,

ଚୁଲି ନିଆଁକୁ କରିବେ ପିଲାଏ ମିତ ।

ବୁଢ଼ା ବୁଢ଼ୀ ଛୁଆ ଯେତେକ ଥିବେ,

ଚୁଲିକୁ ଆବୋରି ବସିଣ ଯିବେ ।

ମା' ରାନ୍ଧି ଦେବ କେତେ ତିଅଣ,

ଚୁଲି ପାଖରେ ବସି କରିବେ ମେଲଣ ।

ସାଙ୍ଗ ହୋଇ ଭାତ ଡାଲମା ଖାଇ,

ମା' ଗୁଣ ସଭିଏଁ ଭାଇ ଭଉଣୀ ଗାଇ ।

ନିଜ ନିଜ ପଢା ଘରକୁ ଯିବେ,

ଖୁସି ମନେ ସିଏ ପାଠ ପଢିବେ ।

ରାତି ଗଡି ଯିବ ହେବ ସକାଳ,

ଏପରି ଲାଗିଥାଉ ସଂସାର ଜଂଜାଳ ।

କେତେ ମଜ୍ଜା ଗପ ଚୁଲି ମୂଳରେ,

ଘେରି ବସିଥାଇ ସଭିଏଁ ଯେବେରେ ।

ଏପରି ଦିନ ହୋଇଲା ସପନ

ଆଉ ନାହିଁ ସେ ହଜିଲା ଦିନ ।