ଆଖିରେ ଆଖି ମିଶିଗଲା
ଆଖିରେ ଆଖି ମିଶିଗଲା
ଆଖିରେ ଆଖିଟି ମିଶିଗଲା ଯେବେ
ଆନନ୍ଦରେ ଆଖି ନାଚିଗଲା,
ଆକାଶର ତାରା ଚାହିଁ ରହିଥିଲେ
ଚାନ୍ଦର ଚାନ୍ଦିନୀ ହସୁ ଥିଲା। [୧]
ନିର୍ମଳ ଶରତ ଗଗନରେ କିବା
କଳା ମେଘ ଖଣ୍ଡ ଭାସୁଥିଲା ,
କଳା ଭଅଁର ସେ ଆଖି ଦୁଇ ସତେ
ମନ ତଳ କଥା ଖୋଲି ଦେଲା। [୨]
ସରମେ, ସକାଳ କୁମୁଦିନୀ ସମ
ଆଖିର ପାଖୁଡା ଶୋଇଗଲା,
ସୁକୁମାରୀ ଲାଜକୁଳୀ ଲତାଟି କି
ଶିଶିର ଆଘାତେ ନଇଁ ଗଲା । [୩]
ସାଧା ସିଧା ସଫା ହୃଦୟରେ ମୋର
ପ୍ରେମ ରଙ୍ଗ ଛିଟା ଲାଗିଗଲା,
ହୃଦୟର ରଙ୍ଗ କଅଁଳ ମନରେ
ସୁନ୍ଦର ସପନ ସାଜି ଦେଲା । [୪]
ସୁନ୍ଦର ସପନ ମିଠା ମିଠା ଆଶା-
ସୁନେଲି କିରଣ ଢାଳିଦେଲା,
ସୁନେଲି କିରଣ ପ୍ରିୟାର ତନୁରେ
ବୋଳି ହୋଇ ସତେ ଝଲସିଲା । [୫]
ତନୁ ବଲ୍ଲରୀରେ ସଜେଇ ହେବାକୁ
ପ୍ରାଣ ମୋ ବିକଳ ହୋଇଗଲା,
ବିକଳ ପ୍ରାଣକୁ ମଙ୍ଗଳ ମହୁରୀ,
ଶୁଭ ଶଙ୍ଖ ଧ୍ୱନି ଶୁଭିଗଲା । [୬]
ଶଙ୍ଖିନୀର ହାତ ଧରି ମୁଁ କହିଲି
"ପ୍ରିୟା ମୋର ଅଳି ଘେନ ଭଲା,
ମନ ମନ୍ଦିରରେ ସଜେଇ ରଖିବି
ହୃଦୟର ଭାବ ବୁଝ ଭଲା"। [୭]
ହୃଦୟ ବିଦାରି ଗଣ୍ଡ ଦେଶେ ମୋର
ସରୁ ଚଟକଣା ବସି ଗଲା,
"ତିନୋଟି ଛୁଆର ମା ମୁହିଁ ପରା,
ମୂରୁଖ ପଣିଆ ସରି ଗଲା?" [୮]
ସେହି ଦିନଠାରୁ ଆଉ କା ଆଖିରେ
ଆଖି ମିଶେଇବା ଭୟ ହେଲା,
ମଥାକୁ ନୁଆଇଁ ବାଟ ଚାଲୁଅଛି
ଚିର କୁମାର ମୁଁ ସୁନା ପିଲା ।