ଆଜିଠାରୁ
ଆଜିଠାରୁ
ଆଜିଠାରୁ
ତୁମ ଗଳି ରାସ୍ତା ମୋ ପାଇଁ ଅଚିହ୍ନା
ଅଚିହ୍ନା ହେବ ଆମ୍ବ ବଉଳର ବାସ୍ନା
ତୁମ ଘର ଶ୍ୱାନ ଛୁଆ ବି ଭୁକିବ
ମୋତେ ଦେଖି ବେଗେ ଝିଙ୍ଗାସି ଆସିବ
ପର ଆପଣାର ପ୍ରାଚୀରଟେ ଗଢ଼ି
ଦୂରେଇ ରଖିବ କ୍ରୁଦ୍ଧ ନେତ୍ର ବାଢ଼ି
ତୁମ ଦାଣ୍ଡ ପିଣ୍ଡା ମସିଣା ବି ମୋତେ
ନ ଦେଖିଲା ପରି ଆଡ଼ ଆଡ଼ ନେତେ
ନିରବ ନିଥର ପଡ଼ି ରହିଥିବ
ସତେ କି ମୁଁ ଏକ ଗ୍ରହାନ୍ତର ଜୀବ
ଆଜିଠାରୁ
ତୁମ ବାପା ଭାଇ ବନ୍ଧୁ ପରିଜନ
ମୋ ପାଇଁ ସାଜିବେ ପୋଥି ପୁରାତନ
କାଁ ଭାଁ ଦେଖା ହେଲେ ବାଟେ ଘାଟେ
ପଚାରିବେ ତୋଳି ନିରସ ମୁହଁଟେ
ଉତ୍ତର ସକାଶେ ଅପେକ୍ଷା ନ ଥିବ
ଅଲୋଡ଼ା ଅଜଣା ସତେ ଲାଗୁଥିବ
ଛିନ୍ନ ଅଧିକାରେ ଫେରି ଚାହିଁବାକୁ
ଅବା ତୁମ କଥା କିଛି ଶୁଣିବାକୁ
ଏ ଭଗ୍ନ ହୃଦୟେ ସାହସ ନ ଥିବ
ଶୂନ୍ୟ ଆଖି ତୋଳି ଖାଲି ଚାହୁଁଥିବ
ଆଜିଠାରୁ
ତୁମ ଗାଁ ତୁଠ ହେବ ସାତ ପର
ନଈ ପଠା ହେବ ଅଶ୍ରୁର ନଅର
ଗାଁ ମୁଣ୍ଡେ ସ୍ଥିତ ବୁଢ଼ୀ ଠାକୁରାଣୀ
ପର ହେଇଯିବ ଦେଖୁ ଦେଖୁ ପୁଣି
ବିଲ ହିଡ଼ ବନ୍ଧ ଗାଁ ଗିରି ତରୁ
ଲିଭି ଲିଭି ଯିବେ ମାନସ ପଟରୁ
ଯେ ସମୟେ ତୁମେ ସବାରି ଊିତରେ
ପାଦ ବଢ଼ାଇବ ଖୋଜିଲା ଆଖିରେ
ସାହସ ମୋ ବେଳୁ ବେଳୁ କ୍ଷୀଣ ହେବ
ମନେ ଯା ଗାରଟେ ଗାଢ଼ ହେଇଯିବ
ଆଜିଠାରୁ
ସ୍ମୃତି ତଳେ ତୁମେ ନିତି ଜଳୁଥିବ
ଅପାଶୋରା କ୍ଷଣ ଇନ୍ଧନ ସାଜିବ
ହସୁଥିବ ଓଠ କାନ୍ଦୁଥିବ ହିଆ
କୋହର ଅନଳେ ଜାଳି ମୋ ଦୁନିଆଁ
ମାନ ଅଭିମାନ ଏକା ଏକା ହେବ
ତୁମ ଭାଗିଦାରୀ ଆଦୋଉ ନ ଥିବ
ନିଜ ହାତେ ନିଜ ଲୁହ ପୋଛୁଥିବି
ତୁମ ପଣତକୁ ଝୁରି ମରୁଥିବି
ଆତ୍ମା କି ଅଲଗା ହୁଏ ଦେହ ଠାରୁ
ଜଡ଼ ପାଲଟିବି ନିଶ୍ଚେ ଆଜି ଠାରୁ
ଟି.ଦୁର୍ଗା ପ୍ରସାଦ ରାଓ