ଆଜିର ନାରୀ

ଗୋଟିଏ ଟଙ୍କାର ଦୁଇ ପାଖ ଭଳି

ସଂସାରରେ ନର ନାରୀ।

କରନ୍ତି ନିବାସ ବିଷାଦ ହରଷ

ମନେ ବା ଥାଏ କାହାରି।

ଦେଶ ଜଣାଯାଏ ଝିଅର ପାଠରୁ

ଜାଣନ୍ତି ଏହା ସଭିଏଁ ।

ଆଜିର ନାରୀ ବୁଝିଛି ଏହି କଥା

ପ୍ରଗତିଶୀଳା ସେ ହୁଏ ।

ଅଦମ୍ୟ ଉତ୍ସାହ ବିଶ୍ୱାସ ବଳରେ

ବର୍ଦ୍ଧିତ ଆଜିର ନାରୀ ।

ଧରାକୁ ସରା ସେ ଜ୍ଞାନ କରିଥାଏ

ନ ଯାଏ କେବ ସେ ହାରି ।

ଜଗଜ୍ଜିତା ସିଏ ନିପୂଣା କର୍ମରେ

ନାହିଁ ବି ଏମିତି କାମ ।

ଯେଉଁଥିରେ ସିଏ ନ ଦେଇଛି ଯୋଗ

ପାଳି ନିଜର ଧରମ ।

ସମକକ୍ଷ ହେବ ପୁରୁଷ ସହିତ

ଲାଗିଛି ଆଜିର ନାରୀ ।

ନାରୀ ସ୍ଵାଧୀନତା ନାରୀ ସ୍ଵାଧୀନତା

ସବୁଠି ପଡୁଛି ହୁରି ।

ସକଳ କ୍ଷେତ୍ରରେ ଅବତୀର୍ଣ୍ଣା ଆଜି

ଆଧୁନିକା ନାରୀ ସିଏ ।

ଜ୍ଞାନ ବିଜ୍ଞାନର ଆଲୋକ ବର୍ତ୍ତିକା

ସଭିଙ୍କୁ ବାଟ ଦେଖାଏ ।

ଗରବ କରନ୍ତି ପିତା ମାତା ତାର

ଦେଖି ତାର ବୁଦ୍ଧି ବଳ ।

କେତେ ନୂଆ ନୂଆ ଉଦ୍ଭାବନ କରେ

କରି କଳ କଉଶଳ ।

ପାରିବିନି ବୋଲି ଭାବନା ତାହାର

ମନରେ ଟିକିଏ ନାହିଁ ।

ସାଧନାରେ ତାର ସିଦ୍ଧି ସେ ଲଭିଛି

ଆଜିର ନାରୀ ତ ସେହି ।