ଆହ୍ୱାନ

  

      

ପୁଣ୍ୟଭୂମି ଏଇ ଭାରତ ମା'ର

କୋଳ କରି ପରିପୂର୍ଣ୍ଣ,

ଜାତ ହୋଇଥିଲେ ପୁଣ୍ୟପୁରୁଷ

ସ୍ବାମୀଜୀ ବିବେକାନନ୍ଦ ।

ବୁଦ୍ଧଦେବ ସମ ସତ୍ୟ ସନ୍ଧାନୀ ,

ଆଧ୍ୟାତ୍ମିକତାରେ ବ୍ରତୀ

ଗୁରୁ ରାମକୃଷ୍ଣ ଆଦର୍ଶ ଗ୍ରହଣେ

ପ୍ରାପ୍ତ ଦିବ୍ୟ ଅନୁଭୂତି ।

ସେ ମହାମନିଷୀ ବିବେକାନନ୍ଦ

ସଦଗୁରୁ ଚରଣାଶ୍ରିତ

ପ୍ରଚାର କରିଲେ ପାଶ୍ଚାତ୍ୟ ଦେଶେ

ହିନ୍ଦୁ ଧର୍ମ ସାରସ୍ୱତ।

ହିନ୍ଦୁ ଧର୍ମ ଅଟେ ଜନନୀ ସ୍ୱରୁପା

ସର୍ବ ଧର୍ମେ ଗରିୟସୀ

ପ୍ରଚାର କରିଲେ ବିଶ୍ୱ ଦରବାରେ

ଭାରତ ଗୌରବ ରାଶି ।

ପ୍ରଚଣ୍ଡ ପ୍ରତିଭା, ମହନୀୟ ସତ୍ତା

ମହୀରେ ପ୍ରକାଶି ଥିଲେ ।

ସ୍ୱଳ୍ପ ସମୟର ଜୀବନ ମଧ୍ୟରେ

ଉଜ୍ଜ୍ୱଳ ଜ୍ୟୋତିଷ୍କ ତୁଲେ।

ହେ ମନୁସନ୍ତାନ ତୁମେ ମହିୟାନ 

ଧରା ବକ୍ଷେ ଅବତରି

ଆହ୍ୱାନ ଦେଲ ଯୁବ ସମାଜ କୁ

ବେଦ, ବେଦାନ୍ତ ପ୍ରଚାରି ।

"ହେ ଯୁବ ସମାଜ ଜାଗ ଏବେ ଜାଗ  

ଆର୍ଯ୍ୟାଵର୍ତ୍ତ ଧନଞ୍ଜୟ ।

ସତ୍ୟ, ଧର୍ମ ,ନ୍ୟାୟ, ନୈତିକଶିକ୍ଷା

ହେଉ ଜୀବନର ଲୟ।"

ଆଧ୍ୟାତ୍ମିକତା ଦୂର କରିଥାଏ

ଦୁନିଆଁର ଆବିଳତା ,

ବେଦ ବେଦାନ୍ତ ଦେଖାଏ ଯେ ପଥ

ହୃଦେ ଭରେ ପବିତ୍ରତା ।

ମନୁଷ୍ୟର ସର୍ବ ଶକ୍ତି ର ଆଧାର

ଶାସ୍ତ୍ର ସମ୍ମତ ବାଣୀ

ଉନ୍ମୁକ୍ତ କରେ ଶାନ୍ତି ର ପଥ

ଆତ୍ମା ପବିତ୍ର ଜାଣି।

ଦୁର୍ବଳତା ସବୁ ତ୍ୟାଗ କରିଦିଅ

ଶକ୍ତି ପ୍ରାପ୍ତ ହେବାପାଇଁ 

ସମ୍ଭାବନା ମୟ ସୌର୍ଯ୍ୟ ତୁମର

ପ୍ରକାଶ ହୋଇବ ଯାଇଁ।

ସୁପ୍ତ ତୁମର ଆତ୍ମାକୁ ଜଗାଅ

ଜାଗୁ ଅନ୍ତର ଦୃଷ୍ଟି।

ହୃଦୟେ ତୁମର ଆକାଂକ୍ଷା ଭରୁ

ଇଶ୍ୱର ଦର୍ଶନାଭିଳାଷି।