ଆଗ୍'ଭାରି
ଆଗ୍'ଭାରି
1 min
253
ଖପ୍'ସି ଝୁରି ଲେଖେ ଛଟ୍'କୁ ଥିସି
ଭଁଟା ଥି ପଡିକରି
ଚହରା ଦେଇ ଚାହାଲି ହେସୁ
ଦେଖେଇ ଆଗ୍'ଭାରି ।
ନାଇଁ ଦେଖୁ କିଛି ଆକ୍'କେ ପଛ୍'କେ
କିଏଁ କାଣା କହିଦେବା
ଆଏଖ୍ ମୁଜିକରି ସୁତୁରାଉ ଥିସୁ
ଭାଏଲ୍ ବାଜିଯିବା ।
ନିଜ୍'କେ ବଡା ଚାଲାକ୍ ଭାବ୍'ସୁ
ସବ୍'କୁ କହୁଁ ବେଡାଁ
ପକାଲା ଡଲା ଲେଖେ ପକେଇ ହେସୁ
ଲୋକ୍ ଥିସନ୍ ଯେନ ଗୁହୁଡାଁ ।
କଲର୍ କଲର୍ ହେସୁ ସବୁବେଲେ
ଥାବେ ନାଇଁ ରହୁ ଘାଏଁ
ଜାଣା ମନ୍'କେ ଆଏଲା ପର୍'ଘାସୁ
ସେଥିର୍ ଭାବ୍ ନାଇଁ ଥାଏ ।
ପାଚେନ୍ ବାଡି ପଡ୍'ବା ଯେନ୍ ଦିନ
ତୋର୍ ଦିହେଁ ଜାନ୍'ବୁ
ଆଗ୍'ଭାରି ହେବାର୍'ଟା ଛାଡିଯିବା
ଦିହିଁକେ ସୁଆଲୁଥିବୁ ।