(ଆଦ୍ୟାଶକ୍ତି)

ଭିଜା ଭିଜା ମାଟି ଗନ୍ଧ ଚତୁର୍ଦ୍ଦିଗେ ବିଛୁରିତ

ଶୁଭ୍ରକାନ୍ତି କାଶତଣ୍ଡୀ ଢାଙ୍କିଦିଏ

ଧରଣୀର ଅଙ୍ଗ,

ନିର୍ମଳ ନଦୀ ଜଳ ଧାବମାନ କଳକଳ

ପଦଧୌତ କରୁଅଛି ସହଜାତ ପବୃତ୍ତି ପ୍ରକାଶେ ।

ଆବାହନୀ ସଙ୍ଗୀତ ସହିତ

ଗଙ୍ଗଶିଉଳୀର ଝରାଫୁଲ ହସେ ।

ମହମହ ବାସ୍ନା ଭରା ବସୁନ୍ଧରା

ସଜହୋଇ ସୃଷ୍ଟିକରେ ସୃଜନର ସ୍ୱର

ସରଗୁ ଓହ୍ଲାଇ ମାଆ ଆସିବେ ମରତେ

ମିଳିଲାଣି ପୂର୍ଣ୍ଣ ପ୍ରତିଶ୍ରୁତି,

ମାଆ ଗୋ ମାଆ ଆଦ୍ୟାଶକ୍ତି

ମହାଶକ୍ତି ପରମା ପ୍ରକୃତି ।

ନାଶକରି ମହାଅରି ଭରିଦିଅ

ତେଜୋଦୀପ୍ତ ସର୍ଵ କ୍ରିୟାଶକ୍ତି ।

ଏ ଧରା ଧାମକୁ ଅବତରି ଆସ

ଦୁସ୍ଥ ଜନଙ୍କ ଦୁର୍ଗତି ନାଶ

ମାଗୋ ଦେବହୂତା ମହାମାୟା ,

ଅମୃତ ପରଶେ ହୋଇଉଠୁ ଧରା

ଦିବ୍ୟ ଚେତନା ଯୁକ୍ତ ।

ମୋହ ଫାଶ ହୋଇଯାଉ ମୁକ୍ତ।