ଆଧୁନିକତା
ଆଧୁନିକତା
ସଂସ୍କୃତି ଚଳଣି ହଜିହଜିଯାଏ
ଆଧୁନିକତାର ଛୁଆଁରେ
ଯୁବ ଗୋଷ୍ଠୀ ସବୁ ବାଟ ବଣା ଏବେ
ପାଶ୍ଚାତ୍ୟ ସଭ୍ୟତା ଧୂଆଁରେ ।
ମାଆ ବାପା ଡାକ ମଉସା ମାଉସୀ
ପୁରୁଣାକାଳିଆ ହେଲାଣି
ମମି ଡାଡି ସଙ୍ଗେ ଅଙ୍କଲ ଓ ଆଣ୍ଟି
ସେମାନଙ୍କ ଜାଗା ନେଲାଣି ।
ଲେମ୍ବୁ ସରବତ ଗୋଳା ହେଉନାହିଁ
ମିଠା ହେଉ ଅବା ଲୁଣିଆ
ଥଣ୍ଡା ପାନୀୟ ତ ଦୋକାନୁ ଆସୁଛି
ଘରକୁ ଆସିଲେ କୁଣିଆ ।
ଭୂମିଷ୍ଠ ପ୍ରଣାମ, ଦଣ୍ଡବତ ଏବେ
ଧୀରେଧୀରେ ହଜି ଗଲାଣି
ସକାଳ ହେଉକି ସଞ୍ଜବେଳ ଗୁଡ୍
ମଣିଙ୍ଗ୍ ବାଇଆ କଲାଣି ।
ଘର ଜଳଖିଆ ପୁରୁଣାକାଳିଆ
ଫାଷ୍ଟ ଫୁଉଡୁରେ ସଉକି
ପ୍ଲାଷ୍ଟିକ୍ ଗଦିର ଆଦର ବଢିଛି
କାନ୍ଦୁଅଛି କାଠ ଚଉକି ।
ବାହା ହେଲା ଝିଅ ଶାଢୀ ନୁହେଁ,ଜିନ୍
ନାଇଟିରେ ମନ ବଳୁଚି
ଶଙ୍ଖା ସିନ୍ଦୂରକୁ ପିନ୍ଧୁନାହିଁ ବୋହୁ
ଟିକିଲିରେ କାମ ଚଳୁଚି ।
ବେଶପୋଷାକରେ ଚାଲିଚଳଣିରେ
ଶାଳୀନତା ଯଦି ଭରିବ
ଯୁଗ ଉପଯୋଗୀ ହେବା ପାଇଁ ସତେ
ମନା କିଏ କାହିଁ କରିବ ।