ଆ ମିତ ଆମେ ଉଡିବା

ଆ ମିତ ଆମେ ଉଡିବା .....

ଦୂରେ ଦୂରେ ରହି ଉଡିବା I

ଦୁଇ ମନ ଯୋଡି ପରସ୍ପର ଟିକେ

ହୃଦୟ ଆବେଗ ମାପିବା,

ଦୃଶ୍ୟ ଅନ୍ତରାଳୁ ଅଦୃଶ୍ୟ ନହୋଇ

ସମIନ୍ତର ପଥ ଧରିବା I [୧ ]

ଆ ମିତ ଆମେ ଉଡିବା........

ସୁନେଲି ସୂରୁଜ କିରଣେ ଗାଧୋଇ

ଚିକି ମିକି ଚିକି ଦିଶିବା,

ମନ୍ଦ ସମୀରର ମିଠା ମିଠା ଛୁଆଁ

ପୁଲକେ ଶିହିରି ଉଠିବା I [୨]

ଆ ମିତ ଆମେ ଉଡିବା........

ଆକାଶ ଛାତିର ଢେଉଢେଉ ମେଘ

ସାଥେ ଲୁଚକାଳି ଖେଳିବା,

ତୁଉ ମୁଁଉ ଭାବ ଭୁଲିଯାଇ ଟିକେ

ବିଭୋର ବେଳରେ ମଜିବା I [୩]

ଆ ମିତ ଆମେ ଉଡିବା........

ନିରାଶ ମନରେ ଅୟୁତ ଯୁଗର

ପିପାସାକୁ ଆଣି ଭରିବା,

ଉଦାସ ଆଖିରେ ଆଖିଏ ଇନ୍ଦ୍ରଧନୁ

ଆଶା ତୋଳି ଧରିବା I [୪]

ଆ ମିତ ଆମେ ଉଡିବା........

ଜୀବନର ପ୍ରାପ୍ତି ଅପ୍ରାପ୍ତିର ସ୍ମୃତି

ସମୀକରଣରେ ମଜିବା,

ଅନୁଭୂତି ଆଉ ପରିପକ୍ୱ ଜ୍ଞାନେ

ଜୀବନ ଦର୍ଶନ ଖୋଜିବା I [୫]

ଆ ମିତ ଆମେ ଉଡିବା........

ଅଙ୍ଗାରକୁ ଧୋଇ ସଫା କରିବାର

ଉନ୍ମାଦ ପ୍ରୟାସ ତେଜିବା,

ବିବେକ ଜ୍ଞାନର ଉଜ୍ଜ୍ଵଳ କିରଣେ

ମନର ମଇଳା ଧୋଇବା I [୬]

ଆ ମିତ ଆମେ ଉଡିବା........

ମିଛ ମରୀଚିକା ପଛେ ଧାଇଁ ଧାଇଁ

ହତାଶେ ଆଉ ନ ଡୁବିବା,

ଚିର ଅମ୍ଲାନ ସତ୍ୟ ସନ୍ଧାନର ବ୍ରତୀ

ହୋଇ ଆମେ ହଜିବା I [୭]

ଆ ମିତ ଆମେ ଉଡିବା........

ଲୋଭ ମୋହ କାମ ବନ୍ଧନରୁ ଚିର

ମୁକ୍ତିର ଆନନ୍ଦ ଖୋଜିବା,

ଜୀବନର ଶେଷ ପ୍ରହରରେ ଟିକେ

ପରମାନନ୍ଦଙ୍କୁ ଭଜିବା [୮]

ଆ ମିତ ଆମେ ଉଡିବା........।