'ଅ' ରେ ଆରମ୍ଭ 'କ୍ଷ' ରେ ଶେଷ

କହିବି ନାହିଁ ମୁଁ   ଚାଲିଯିବି ଦୂରେ

     କହିବାକୁ ମୋତେ

     ସୁଯୋଗ କାହିଁ !

ସୁଯୋଗ ଥିଲେ ବି ସମୟ ତ ସ୍ୱଳ୍ପ

     କହି କି ପାରିବି

     କାହାକୁ ଯାଇ !

ପଦଧ୍ୱନି ମୋର  ଶୁଭି ତ ନଥିଲା

     ଅଗ୍ରୀମ ଭାବରେ

     ଆସିବା ବେଳେ ।

ଆସିଛି ମୁଁ ଏକା ଯିବି ଚାଲି ଏକା

     ନିଶୂନ୍ ପ୍ରହରେ

     ନିର୍ବାଣ କୋଳେ ।

ଜନମ ମରଣ   ବିଧିର ବିଧାନ

     ସମୟକ୍ରମରେ

      ଅନୁପୂରକ ।

ଜୀବନ ରଥର ଆବର୍ତ୍ତିତ ପଥେ

     ଧରମ କରମ

      ପରିପୂରକ ।

ପରିପୂରକ ଏ କର୍ମ ବଳୟରେ

      ଅନୁପୂରକ ତ

     ସୁଖ ଓ ଦୁଃଖ ।

ସୁଖରେ ବିଭୋର ଦୁଃଖରେ ଅଧୀର

     ହୋଇନି,ହେବିନି

       ଆତ୍ମବିମୁଖ ।

ଏ ଜୀବନ ମୋର ମଧୁ ବର୍ଣ୍ଣମାଳା

     'ଅ' ରେ ଆରମ୍ଭ

     'କ୍ଷ' ରେ ଶେଷ ।

ଜନମିଥିଲି ମୁଁ ମାଆ କୋଳେ ସିନା

     ମଶାଣିରେ ଅଛି

     ମରଣ ଦୋଷ !

ଅଲଙ୍ଘନୀୟ ଏ  ମରଣ ବକ୍ଷରେ

     ମୋ' ବିଜୟ ହେବ

      ଅପରାଜେୟ ।

ଚାଲିଯିବି ସିନା  ରହିଯିବ ମୋର

     ଅନଶ୍ଵର କୃତି

     ହୋଇ ବିସ୍ମୟ !