स्त्री जन्माचा महिमा
स्त्री जन्माचा महिमा
ओवी सांगे तुम्हा माझी
महिमा हो स्त्री जन्माचा
घ्या रे समजून 'ती'ला
होईल उद्धार युगांचा||१||
अनोखीच निर्मिती 'ती'
आहे देवाधिदेवाची
नाही होणार तिच्याशी
बरोबरी गं कोणाची ||२||
लेक,सखी,ताई,आई
भोगते सासुरवाशीण
एका-एका वाटेवर
काटे घेतेया टोचून ||३||
माऊलीच्या हृदयात
माया मधाळ पाझर
यत्ने आटणार नाही
काय वर्णू मी पामर ||४||
सदा दुःखाचीच सल
नारी उरात दाबते
येते माहेर सोडून
नव्या संसारी साजते ||५||
म्हणे नको 'ती'पणती
हवा 'दिवा' ग वंशाला
बट्टा लावे का ती सासू
स्वतः स्त्रीच्याच जन्माला ||६||
मनी माया फुलविते
चिंता मनाचा कालवा
संजीवन देई बाळा
ओठी पान्ह्याचा ओलावा ||७||
नयनी आसवांचा पूर
आनंदाचा गं दुष्काळ
संसाराच्या काळजीने
मनी जपते हिरवळ ||८||
जग करते पूजन
नदीमाय नि गायीचे
घरची लक्ष्मीच सांगा
का हो वाहन पायीचे ||९||
वंदा साऊ, रमा मनी
मुजरा जिजाऊ,अहिल्येला
सप्तसूर्यतेजाठायी
आसमंतही लाजला ||१०||