शाळा..एक आठवण

 शाळा नव्हेच फक्त ती

 तर जिव्हाळा जन्मभरासाठी

आठवणींचे रंग सदोदित

मनगाभारी उधळण्यासाठी.... १

 ज्ञानगंगोत्री आईच अपुली

निर्व्याज प्रेमाची बरसात

शाळेतल्या बाई शिकवती

अज्ञानावर करण्या मात.... २ 

शाळा घरअंगण झाली

असा लागला लळा

शिस्तीचे मज धडे गिरवुनी

सावध करी वेळोवेळा.... ३ 

ग म भ न संगे मजला

आचार शुद्धी शिकविली

सद्विचार दिला तिनेच

अन् समृद्धी जीवा लाभली..... ४ 

परखड नेतृत्वाचा आणिक

 निर्णयक्षमतेचाही पाठ पढवला

 स्वैराचार नव्हे स्वातंत्र्याचा

 अर्थ खरा समजावला. ...५ 

छंद मनाचे तिनेच जपले

ना विचार कधी दडपले

मुक्त हिरव्या रानी जणू

हृदयपाखरु झेपावले... ६ 

सुखासह दुःखातही साथी

सच्चे तिनेच दिधले मैत्र

बालपणाचे अजूनही कायम

रेखीव मनःपटलावरती चित्र... ७