न वाचलेलं पुस्तक

तू वाचलं नाही पुस्तक कधी

नुसतीच पानं पालटत गेली

तुला कल्पना नसेल कदाचित

पण मनाची पानं चुरगळत गेली..!

नाही! वाचलेच पाहिजे असे नाही

पण किमान चाळायला तरी हवे होते

नियम जरी अलिखित असले

तरी संकेत त्यांचे पाळायला हवे होते..!

तसं कळतंय मलाही 

हल्ली वेळेअभावी वाचन होत नाही

पण म्हणतात ना मानसिकता हवी

नेमकी तीच कुठे दिसत नाही..!

न पेक्षा एक काम कर!

बंद कर पुस्तक अन् फेकून दे रद्दीत

खात्री आहे, कधीतरी कामास येईल 

तेच "न वाचलेलं पुस्तक" तुझ्या अडीअडचणीत..!