मृगधारा

नभ ढगाळलं सारं

वाहे गार गार वारा

सर्वा लागली चाहुल

बरसल्या मृगधारा||१||

झाली थेंबाची झिम्मड  

न्हाला पाण्यात आषाढ

शांत झाली धरतीची

तगमग अन् ओढ||२||

धुंद मृगाच्या स्पर्शानं

जागे झाले माळरान

हसे मातीच्या कुशीत

गोड उद्याचं सपान ||३||

उंच डोंगराची माळ

झाली न्हाऊन नितळ

वाहे दऱ्याखोऱ्यातून 

शुभ्र पाण्याचे ओहळ||४||

येता आभाळ दाटून

होते पावसाची वृष्टी

सुखकर धरा झाली

आनंदली सारी सृष्टी||५||

पावसाची सर येता

कोंब मातीतून येती

दाणा अंकुरण्यासाठी

प्रसवली ही धरती||६||