माझी मराठीची बोली

स्वर्गे अमृताची गोडी, माझी मराठीची बोली..

सामावून सकलांना तिने हृदय जिंकली..!!

किती सुंदर वलय,शोभे देवाचे आलय..

झुले सह्याद्री मलय,सुज्ञ ज्ञानाचा प्रलय..

तिची शीतल सावली जशी माय माऊली

स्वर्गे अमृताची गोडी,माझी मराठीची बोली..!!

नाही संकटाची भीती,राकट रांगडी माती..

आपुलकीची ही नाती,किती सांगावी महती..

विविधतेत नटली,खेड्यापाड्यात जपली..

स्वर्गे अमृताची गोडी,माझी मराठीची बोली..!!

जशी दुधावर साय तशी मराठी ही माय..

माझा गर्व माझा जय,तिचे वंदितो मी पाय..

नभी पताका झुलली,स्वाभिमानात रंगली

स्वर्गे अमृताची गोडी,माझी मराठीची बोली...!!