// लाखात एक माझी बहीण //

रुसणं फुगणं भांडणं यातच

भाऊ बहिणीचं नातं मुरतं

नसेल भांडण नसेल रुसवा

तर नावापुरतं फक्त हे उरतं...//

जरी लहान असलो तरी मी

माझ्या ताईचं रक्षण करतो

ताई माझा जीव की प्राण

तिच्यासाठी जे हवं मी करतो...//

धाक दावते जरी मला पण

प्रेम मात्र ती अमाप करते

माझा येडा भाऊ म्हणूनी

प्रेमाची मज ती हाक मारते‌..//

लाखात एक माझी बहीण

गर्वाने मी जगास सांगतो

ताई कधी सोडणार नाही

वचन राखी बांधताना देतो...//

मनातले माझ्या सारे काही

सांगताना ती होते मैत्रीण

कवेत घेते क्षणात मजला

कधी असते मायाळू बहीण...//

लाडाची गं गोड गोजिरी तू

ताई माझी लाडकी बाहुली

कधी बनते आई आपली तू

देतेस माया जशी माय माऊली...//