नाजूक फुलावरी

जीव जडला माझा या नाजूक फुलावरी...//धृ//

धरा नटली हिरवाईने मज भूरळ पाडते

फुलपाखरू भोवती भिरभिर हे फिरते

निसर्गाचा सहवास लाभलाय जरी

जीव जडला माझा या नाजूक फुलावरी...//१//

कोवळी पाकळी ही लाजेने उमलली

रूप तिचे पाहता मनी माझिया वसली

मन वेडावले कोवळ्या त्या कळीवरी

जीव जडला माझा या नाजूक फुलावरी...//२//

निसर्ग बहरला इंद्रधनू नभी आला

सप्तरंगी छटांचा भाळला मनाला

श्रावणाच्या प्रीत धुंद बरसल्या सरी

जीव जडला माझा या नाजूक फुलावरी...//३//