जिव्हाळा
जिव्हाळा
भविष्याच्या शोधात , वर्तमानही माझा झाला व्यस्त
क्षणभर विसावताना , भूतकाळही करतो मला त्रस्त ।।१।।
का मी धावतो , क्षणभंगूर चैन सुखासाठी
जोडत चाललो , कृत्रिम रेशीम अतूट गाठी ।।२।।
स्वप्नांचे बंध बांधतो मी , करकचून घट्ट
तेवढेच होतात सैल , पूँजी बनून लठ्ठ ।।३।।
विसरत चाललो हव्यासापोटी , सारी नाती-गोती ,
जमवूनि पैसा सोन , तरीही शोधतो हिरे-मोती ।।४।।
अगदी शितं टाकूनि , भूतं जमवित आलो
शितांच्या भरोशावर , मलाच मी परका झालो ।।५।।
महत्तकांक्षांच्या कैफाने , बेधुंद नशीला असा मी
साठवतोय सर्वकाही , नशा होत नाही कमी ।।६।।
भरकटलेला आज मी , हुडकतोय किंचित मनःशांती
मायेच्या माणसांच्या सहवासात , मिळावी थोडी विश्रांती ।।७।।
लाभावा तो पुन्हा , उन्हाळा अन् हिवाळा
सगे-सोयरे नातलगांचा , हरवलेला तो जिव्हाळा ।। ८।।