जात नाही

थंड गारं गारव्याला कोणतीही जात नाही

 गर्जणार्‍या सागराला कोणतीही जात नाही

 चिंब झाली धन्य झाली पावसाने सृष्टी सारी

 प्राणदात्या पावसाला कोणतीही जात नाही

रानवारा संगतीला वृक्षवेली सोबतीला

 खेळणाऱ्या पाखराला कोणतीही जात नाही

 काळरात्री दूर केल्या तो धरेचा भाग्य दाता

तेजणाऱ्या भास्कराला कोणतीही जात नाही 

 मोहणारी बाग आहे खेळणाऱ्या पाडसांची

गंधणाऱ्या मोगर्‍याला कोणतीही जात नाही

 एक वृक्ष खूप मोठा पूर्वजांनी लावलेला 

वाढलेल्या सावलीला कोणतीही जात नाही

एक आहे वंश त्यांचा माणसांचा माकडांचा

माकडांच्या टोळक्याला कोणतीही जात नाही