गंध मातीचा ओला..

भिरभिर भिरार वारा

गंध मातीचा ओला 

दुडूदुडू धावते गाडी

तिला खिल्लारी बैलाची जोडी

    भिरभिर भिरार वारा ... 

वेडीवाकडी रानातली वाट

मध्ये लागती डोंगर घाट

डौलदार खिल्लारी जोडी

वाजती घुंगर तोडी

    भिरभिर भिरार वारा ... 

हिरव्या रंगाची आमराई दाट

वाहे झुळझुळ पाण्याचा पाट

सैरभैर सुटला वारा

झुलतोय शिवार सारा

   भिरभिर भिरार वारा ... 

घेई कोकीळा मधेच तान

पक्षी किलबिल गाती गान

मोराचा डौलच न्यारा

फुलवुनी नाचे पिसारा 

     भिरभिर भिरार वारा ... 

बघता बघता सरलं रान

घर कौलारू दिसलं छान 

भोवताली झाडं लय भारी 

गुण्यागोविंदा नांदती सारी

      भिरभिर भिरार वारा...