વાવી શું કામ ?

મને આ માટીમાં વાવી શું કામ ?

વાવી તો વાવી પણ ઉખાડી જડમૂળથી

બીજે બાગ રોપી શું કામ ?

મને નાજુક કુંપળ શી ઉછેરી શું કામ ?

ઉછેરીને સુંદર નાજુક શી ખીલતી કળી 

બીજાને આંગણ દાનમાં આપી શું કામ ?

વ્હાલપનો વહેતો દરિયો દેખાડી

તરવાને આપી નાનકડી નાવ

રૂપાના ઝાંઝર પગમાં પહેરાવી

રૂમઝુમતા આપી નાનકડા ઘાવ

રક્તરંગી ચૂંદડી ઓઢાડી માથે

આપ્યા ભાલે કંકુચોખાના ડામ

   

તો પછી

મને આ માટીમાં વાવી શું કામ ?

ખુલ્લા આકાશમાં કેવી મજાની

ઉડતી મનગમતી રંગીન પાંખે

અલ્લડ ઉછળતી ઝરણા જેવી

વહેતી શી કલકલતી બારસાખે

પાંખો વીંધીને કહે કે હવે ઉડને 

મનગમતે આનંદે તારે મુકામ

તો પછી

મને આ માટીમાં વાવી શું કામ ?