વાંસળી

વાંસળીના સૂર ઉપર સવાર થઈને શ્યામની સવારી આવે,
ધબકાર વાંસળીના રૂદિયાનો થઈ હવા અલગારી આવે !

મન નીચોવી, તન સૂકવી કાળજા છેદાવી રાહ જોઉં શ્યામની,
મારા ખાલીપામાં પવનની લહેરખી બની ફૂંક તમારી આવે !

લાગણીમાં ઝબોળીને મયુરપંખ,એ રમી ગયો ભલે હોળી,
પછી વાંસળીના સૂરમાં જાણે સુરાની નશીલી ખુમારી આવે !

બંધ આંખે આંગળીઓ ફરે મારા છેદાયેલા કાળજે જો શ્યામની,
ધડકનોમાંથી આઠો પ્રહર પછી રાગ કેદાર ને દરબારી આવે !

સ્પંદનોના તરંગીત વલોણે ઊભરી રહ્યા નવનીત નેહના,
ભાન ભૂલી, કામ છોડી, સૂરની પાછળ દોડતી સન્નારી આવે !

વાદળ ગરજી વરસે, મયુર નાચે કરે કોકિલ કલશોર,
જ્યારે કાલિંદીના કિનારે, કદંબની શાખે શ્યામ વાંસળી બજાવે !

'પરમ' સૂર વાંસળીમાંથી જ્યારે રેલાયા આ તન વૃંદાવને,
'પાગલ' થઈ રાસ રચવા રાધા મારા મનની મતવાલી આવે !