પથિક
પથિક
1 min
359
શબ્દથી નિઃશબ્દમાં જવાય એ અલગારી પથનો પથિક છું,
ને મુજ કર્મ થકી પ્રારબ્ધ સચવાય એવા પથનો પથિક છું !
આ સફરમાં નાવમાં છેદ કર્યા પછી ગુમ છે સૌ સગા વ્હાલા,
જીવનનાં ઉછળતા મધદરિયે એકાકી પથનો પથિક છું !
થિજેલી ક્ષણોને ઓગાળવા મથતો યુગોથી હૈયાની હૂંફથી,
પીગળતા સમય સાથે આકાર બદલતા પથનો પથિક છું !
ગતિમાન હવા તો કામ કરી ગઈ એનું ભારેલા અગ્નિ પર,
અંતરમાં બળબળતી આગથી લથપથ પથનો પથિક છું !
તારી એક ફૂંકથી સર્જાય ઉત્સવ સૂકી વાંસની લાકડીમાં,
પછી સૂર બની રેલાઉં તો ક્ષિતિજ પારના પથનો પથિક છું !
તારા 'પરમ' ભરોસાનું અજવાળું ઝળહળે યુગોથી રાહમાં,
હવે 'પાગલ' થઈ અંધારે આગળ વધતા પથનો પથિક છું !