પ્રીત હોવી જોઈએ
પ્રીત હોવી જોઈએ
હાથમાં ન હોય ભલે એનો હાથ, દિલમાં પ્રીત હોવી જોઈએ,
રોજ ન હોય ભલે એનો સંગાથ, વિરહમાં પ્રીત હોવી જોઈએ !
ભલે એના કામણગારા કેશ ન ભરે જાદુ નજરમાં સમાઈને,
હવામાં ઊડતી ઝુલ્ફની ઊડતી એક લટ સાથે પ્રીત હોવી જોઈએ !
આસમાનમાં ઉડવાની એક તક મળે તો ઝડપી લેવી સારી,
પંખની ઓળખ પછી પણ, કાયમ ધરા સાથે પ્રીત હોવી જોઈએ !
લખતાં લખતાં ભલે ખાલી થઈ જાય સઘળા શબ્દોનો ખજાનો,
પછી સર્જાય ભીતર ખાલીપો, તો એ શૂન્ય સાથે પ્રીત હોવી જોઈએ !
જીવન બાગમાં જે પુષ્પ ખીલ્યાં એ એક દિવસ કરમાવાના જરૂર,
સર્વ સ્વીકાર સહ શાશ્વત સુગંધ સાથે પ્રીત હોવી જઈએ !
અતીતને ભૂલી ને ભવિષ્યમાં ન ભટક્યા કરીએ પલ પલ,
મોત તો ગમે ત્યારે ભલે આવે, જીવન સાથે પ્રીત હોવી જોઈએ !
'પરમ' પામ્યા પછી શું હાર ને વળી શું જીત ? શું સુખ ને શું દુઃખ ?
સાક્ષી બની ભીતરથી જોનાર 'પાગલ' સાથે પ્રીત હોવી જોઈએ !