પનિહારી

જ્યારથી આ વહેતા નીરની મીઠી સરિતાઓ સૂકાઈ ગઈ,

ત્યારથી ગામની શોભા આ પનિહારી ગાયબ થઈ ક્યાં ગઈ ?

સૂના પનઘટ, સૂના પાદર ને સૂની ગોકુળ ગામ જેવી ગલીઓ

ગોપીઓની ગરિમાની એ અભિવ્યક્તિ ગાયબ થઈ ક્યાં ગઈ ?

ને બેડલાઓ નીર ભર્યાં રહેતા'તા અધર પધર મસ્તકે,

એ પનિહારીની અલ્લડ બલિહારી ગાયબ થઈ ક્યાં ગઈ ?

ભલે ને હોય ભવ્ય ભોરનો પ્રહર કે હોય સંધ્યા એ સલૂણી,

પનિહારીની એ મસ્ત મસ્ત ખુમારી ગાયબ થઈ ક્યાં ગઈ ?

કમનીય લચકાતી કમર ને ધરતી ધ્રૂજતી ધમ ધમ,

હતી જે ધરતીનો ધબકાર એ નારી ગાયબ થઈ ક્યાં ગઈ ?

'પરમ' પ્યાસ બુઝાવતી હતી એ પરિવારના કંઠનો સદા,

'પાગલ' સમર્પણનાં પર્યાયની પ્રભારી ગાયબ થઈ ક્યાં ગઈ ?